بلومبرګ: په اسراییلي اهدافو د ایران او ایراني پلوه ډلو له خوا د بریدونو احتمال شته
بلومبرګ په یوه راپور کې د باخبرو سرچینو په حواله لیکلي، چې امریکا او متحدین یې په دې باور دي چې ښايي ایران د اسراییل پر اهدافو بریدونه وکړي.
بلومبرګ په یوه راپور کې د باخبرو سرچینو په حواله لیکلي، چې امریکا او متحدین یې په دې باور دي چې ښايي ایران د اسراییل پر اهدافو بریدونه وکړي.
د بلومبرګ د راپور له مخې؛ د اسراییل د پوځي او حکومتي اهدافو پر وړاندې د ایران او د هغوی د نیابتي ډلو له خوا د توغندیو او بې پیلوټه الوتکو بریدونه "نږدې" دي او تمه کیږي چې ایران به پر ملکي اهدافو بریدونه نه کوي.
وروسته له هغې چې په سوریه کې د ایران پر کونسلګرۍ د اسراییلي ځواکونو له خوا برید وشو، ایران د غچ اخیستنې اعلان وکړ.
په ورته وخت کې د اسراییل دفاع وزیر ویلي وو، چې د ایران او د هغوی د نیابتي ډلو له خوا د هر ډول برید ځواب ته اماده دي.
د اروپا پارلمان له کلونو بحثونو وروسته د چهارشنبې په ورځ په اروپايي ټولنه کې د پناه غوښتنې او کډوالۍ تړون تصویب کړ. د نویو بدلونونو پر بنسټ؛ د پناه غوښتونکو د کډ،الۍ دوسیې او د هغوی د اخراج بهیر چټک شوی دی.
دا تعدیلات باید په رسمي ډول د اروپايي شورا له خوا تصویب شي او باید د ټولو غړو هېوادونو له خوا هم په رسمي ډول ومنل شي.
د دې اصلاحاتو مسوده د ۲۰۲۰ په سپټمبر کې د اروپایي کمېسیون له خوا وړاندیز شوې وه؛ ترڅو په ۲۰۱۶ کې د تېرو خبرو اترو له ناکامۍ وروسته د پناه غوښتنې او کډوالۍ په اړه د اروپایی قوانینو د بیاکتنې لپاره نوې هڅې پیل کړي.
د اروپايي اتحادیي د شورا د بیان له مخې؛ دا قانون وړاندیز کوي چې یو نوی او لازمي د څېړنې او ارزونې سیسټم به په ټولو سرحدونو او اروپایي اتحادیې کې ټولو لارو کې پلي شي.
اروپايي اتحادیې ته د کډوالو د ننوتلو د مخنیوي لپاره د پولو د کنټرول سختول، د هغو کسانو د ګړندي راستنیدو لپاره د توقیف ځایونو جوړول چې پناه یې نه ده منل شوې، په دغو اصلاحاتو کې مهم دي.
دغه راز په نوي تړون کې د ټولو اروپايي هېوادونو له خوا د پناه غوښتونکو پر منلو ټینګار شوی دی.
د دې هدف د یونان او ایټالیا په څېر هېوادونو باندې د فشار کمول دي، چې د افریقایي او اسیایي هېوادونو څخه د کډوالو لومړني ځایونه دي.
د پولنډ په ګډون یو شمېر هېوادونو د غیر اروپايي هېوادونو په تېره بیا د مسلمانو کډوالو د منلو مخالفت کړی دی.
په داسې حال کې چې د اروپايي اتحادیې د کورنیو چارو کمېشنر یلوا جوهانسن دا تړون "یوه تاریخي شېبه" بللې.
په تېرو څو کلونو کې د نړۍوالو بحرانونو د زیاتوالي سره اروپايي اتحادیه د غیرقانوني کډوالۍ او د پناه غوښتنې غوښتنلیکونو له زیاتوالي سره مخ ده.
د اروپايي ټولنې د سرحدي او ساحلي ګارد ادارې د شمېرو له مخې؛ یوازې د ۲۰۲۳ کال په لومړیو یوولسو میاشتو کې د اروپايي ټولنې له بهرنیو پولو څه باندې ۳۸۰ زره ناقانونه تګ راتګ ثبت شوی دی.
د اروپايي ټولنې د پناه غوښتنې ادارې د معلوماتو له مخې؛ د ۲۰۲۳ کال تر پایه د پناه غوښتونکو شمېر ۱.۴ میلیونو ته ورسېد.
د ايران د زعفرانو د ملي شورا منشي ویلي، چې افغانستان د دغه هېواد زعفران پېري او په بهرنيو پېرودونکو يې د خپل محصول په توګه پلوري. د فرشيد منوچهري په وینا؛ افغانستان تېر کال ۴۰ټنه ایراني زعفران اخیستي او د ایران په بازارونو کې یې پلورلي دي.
د ایران د کارګرانو خبري اژانس «ایلنا» د راپور له مخې؛ د ایران د زعفرانو د ملي شورا منشي د چهارشنبې په ورځ د (وري ۲۲مه) وویل، چې د دغه هېواد ډېر صادراتي بازارونه د افغانستان، چین، هسپانیا او قطر دي.
فرشيد منوچهري زیاته کړه: «د افغانستان په څېر هېواد خپل زعفران نه مصرفوي، بلکې د افغانستان د تولیدي محصول په توګه یې په لوړه بیه پلوري.»
دا ادعا په داسې حال کې کېږي، چې له دې وړاندې هم د ایران په نوم نورو هېوادونو ته د افغان زعفرانو د صادرېدو راپورونه ورکړل شوي دي.
د ایران د زعفرانو د ملي شورا د دغه چارواکي په خبره چین ته د دغه هېواد د زعفرانو د صادراتو له کمېدو وروسته د تېر کال په دویمه شپږو میاشتو کې د دغه هېواد د زعفرانو د صادراتو اندازه کمه شوې ده.
ښاغلي منوچهري زیاته کړه، چې ډېری مصرف کوونکي ایران د زعفرانو د ستر تولیدونکي هېواد په توګه نه پېژنې.
هغه وویل: «که یوه ورځ افغانستان د پام وړ زعفران تولید کړي، کولی شي په اسانۍ سره زموږ بازارونو ته ننوځي او زموږ موقف محدود کړي او له ایران څخه واردولو ته بيا اړتیا نه شته.»
د ایران د زعفرانو د ملي شورا منشي ټینګار وکړ، چې زعفران د «سوداګريزي نښې» د ثبت په اړه باید اقدام وشی.
د ١٤٠٢ کال په پاى کې طالبانو وويل، چې د کندهار ولايت په مرکز او ولسواليو کې تر ٤٠٠ جريبه په زياته ځمکه زعفران کرل شوي دي.
هرات ولایت، چې د ایران په ګاونډ کې دی په افغانستان کې د زعفرانو د تولید تر ټولو لوی مرکز دی.
د ټایمز اف اسراییل خبري ویب پاڼې د چهارشنبې په ورځ لیکلي، چې د امریکا له خوا د وړاندیز شوي اوربند له مخې به اسراییل د غزې د شمالي سیمو د ۱۵۰ زرو اوسېدونکو خپلو سیمو ته د ستنیدو سره موافقه وکړي.
د اوربند په تړاو د راپورونو له مخې؛ د اسراییل د اقداماتو په بدل کې حماس باید د هغو ښځو، بوډاګانو او ناروغانو لېست چمتو کړي، چې د دې ډلې له خوا یرغمل شوي او ژوندي دي.
دوو اسراییلي چارواکو ویلي، چې د حکومت ارزونه دا ده چې حماس لا هم د دغه پلان منلو ته زړه نه ښه کوي.
وال سټریټ ژورنال بیا لیکلي چې حماس د امریکا وړاندیز ځکه رد کړی، چې د واشنګټن په پلان کې په سیمه کې د شخړو د بشپړې پای ته رسیدو وخت پکې نه دی ذکر شوی.
دغې ورځپاڼې زیاته کړې، حماس پلان لري چې د روانې اونۍ په وروستیو کې د جګړې د ختمولو په اړه خپل وړاندیز وړاندې کړي.
د الجزیرې خبري شبکې د چهارشنبې په ورځ (د وري ۲۲مه) خبر ورکړ، چې د حماس د سیاسي دفتر د مشر اسماعیل هنیه درې زامن په غزه کې د اسراییل په هوايي برید کې وژل شوي دي. دغې رسنۍ خبر ورکړی، چې په دغه برید کې د ښاغلي هنیه لمسیان هم وژل شوي دي.
د راپورونو له مخې؛ د ښاغلي هنيه زامن حازم، امير او محمد هنيه دي.
د حماس د سیاسي دفتر د مشر دغه اولادونه په غزه کې د کډوالو پر کمپ د اسرايیل په هوايي برید کې وژل شوي دي.
دغې شبکې د اسماعیل هنیه له قوله ویلي، چې ماشومان یې د غزې په شمال کې شاطي کمپ ته د اختر لپاره له خپلې کورنۍ او خپلوانو سره د لیدو لپاره روان وو، چې پرې برید وشو.
د حماس د سیاسي دفتر مشر ویلي، که د حماس د مشرانو کورنۍ او کورونه هم په نښه شي، دوی به له خپل دریځه شا نه شي.
د اسراییل پوځ تر اوسه د دغه برید په اړه څه نه دي ویلي.
الجزیرې خبر ورکړی، چې د اسراییل په بریدونو کې د اسماعیل هنیه د کورنۍ ۶۰ تنه خپلوان وژل شوي دي.
د پاکستان لومړي وزير د مالیزیا، ترکيې، قطر، بحرين، عمان او محتده عربي اماراتو مشرانو ته ټلیفون سره د اختر مبارکي ور کړه. شهباز شریف وايي، له دې مشرانو سره یې پر مبارکۍ سربېره د اسلامي هيوادونو پر ګډه ملګرتيا، د سوداګريزو اړيکو پر پياوړتيا او په سېمه کې پر سوله او ثبات خبرې کړي.
د پاکستان لومړۍ وزير شهباز شريف نن چهار شنبه د کوچني په لومړۍ ورځ پر خپله اېکس پاڼه د هغو هيوادونو د مشرانو یادونه کړې چې ده ور سره نن او یا پرون د اختر مبارکي لپاره ټلیفون کړی دی.
شهباز شريف د مالیزیا لومړي وزیر انوار ابراهیم، د ترکیې ولسمشر رجب طیب اردوغان، د قطر امیر شیخ تمیم بن محمد الثانی، د متحده عربي اماراتو مشر شیخ محمد بن زاید النهیان، د عمان پاچا سلطان هشام بن طارم او د بحرين پاچا حمد بن عیسا ال خلیفه ته زنګ وهلی دی.
شهباز شریف دغو ټولو هيوادونو ته د مبارکۍ ويلو ترڅنګ د همکارۍ غوښتنه کړې او د «اسلامي هيوادونو» د اړيکو پر پياوړتيا يې ټينګار کړی دی.
شهباز شریف پرون د یوه لوړپوړي پلاوي په مشرۍ د سعودي عربستان له دوه ورځني سفر هېواد ته ستون شو.
د سعودي چارواکو له نوموړي سره د پاکستان د خراب اقتصادي حالت په ښه کولو کې د مرستې ژمنه کړې ده.