تېره ورځ د هند په سوداګریز لیګ کې د ګجرات ټایټنز او راجستان رویالز لوبډلو تر منځ لوبه کې راشد خان د خپلې لوبډلې ګجرات ټایټنز په ګټه د یوې مهمې ویکېټې اخیستو ترڅنګ په توپ وهنه کې هم ښه وځلیده او د لوبې غوره لوبغاړی ونومول شو.
د چهار شنبې په ورځ د (وري ۲۲مه) د هند په ستر سوداګریز لیګ ایپيایل کې د ګجرات ټایټنز او راجستان رویالز لوبډلو تر منځ لوبه تر سره شوه.
په یاده لوبه کې د راشد خان لوبډله ګجرات ټایټنز د راشدخان د ښې توپ اچونې او ښې توپ وهنې په مټ وتوانېده چې د لوبې په وروستي اور کې د راجستان رویالز په وړاندې بری ترلاسه کړي.
د تېرې ورځې په لوبه کې لومړی راجستان رویالز لوبډلې توپ وهنه وکړه او خپلې مخالفې لوبډلې ګجرات ټایټنز ته یې ۱۹۹ منډو هدف ورکړ.
د راجستان رویالز د ۱۹۹ منډو هدف پوره کېدو په موخه د ګجرات ټایټنز توپ وهونکو ښه لوبه وکړه چې تر نورو لوبغاړو د دغې ډلې لوبډلمشر شبمن ګېل ۷۲ منډې جوړې کړې.
د لوبې په سختو حالاتو کې چې په ظاهره لوبه د راجستان رویالز لوبډلې په ګټه روانه وه، راشد خان د توپ وهني په موخه د لوبې ډګر ښکته شو.
راشد خان د خپلې لوبډلې لپاره په سخت حالت کې په ۱۱ توپونو ۲۴ ناسوځېدلې منډې جوړې کړې.
راشد خان په دغې لوبه کې په توپ اچونه کې هم یوه ویکېټه ترلاسه کړه او په ډګر ساتنه کې هم ښه وځلیده.
خان د تېرې شپې په لوبه کې د ښې توپ اچونې، بهترینې ډګر ساتنې او د لوبې په سختو شېبو کې د ښې توپ وهنې له امله د تېرې شپې لوبې د غوره لوبغاړي جایزه ترلاسه کړه.
د هند په سوداګریز لیګ کې راشدخان، نور احمد او عظمت الله عمرزی له ګجرات لوبډلې سره، محمد نبي له ممبۍ اینډینز، فضل الحق فاروقي له سنرایزرز حیدراباد او نوین الحق له لکناو سوپر جاینټز لوبډلو سره لوبیږي.
