د اماراتو کرېکټ بورد د جمعې په ورځ (د وري۱۷مه) خبر ورکړی، چې عثمان خان د دې بورډ له تړون څخه سرغړونه کړې، چې له امله یې د ۵ کلونو لپاره د اماراتو کرېکټ بورډ تر چتر لاندې په هېڅ سياليو کې برخه نشي اخیستی.
دغه بورد ویلی، چې له یوې مفصلې څېړنې وروسته څرګنده شوې چې عثمان خان د اماراتو لوبډلې لپاره د لوبیدو په برخه کې د اماراتو له کرېکټ بورډ، اي سي بي، سره له لاسلیک کړي تړون څخه سرغړونه کړې، غلط معلومات یې وړاندې کړي او د دې بورد شته فرصتونه او پرمختګونه یې کارولي او دا هم څرګنده شوه چې نور نه غواړي د اي سي بي لپاره لوبه وکړي.
عثمان د اي سي بي د معیارونه او مکلفیتونو پوره کولو کې هم پاتې راغلی.
عثمان خان د دې کال په پیل کې د اي سي بي له خوا د شل اوریز نړۍوال جام لیګ دویم فصل کې د متحده عربي اماراتو کټګورۍ کې د ځایي لوبغاړي په توګه برخه اخیستې وه. همدا راز، د اماراتو کرېکټ بورد له عثمان خان سره د اي سي بي یو کلن ټړون هم لاسلیک کړی و. دا هر څه د دې لپاره و چې عثمان ته د امن احساس ورکړي او هغه دې ته چمتو کړي چې په نړۍوال کړېکت کې د متحده عربي اماراتو د استازولی لپاره معیارونه پوره کړي.
د اماراتو کرېکټ بورډ وايي، عثمان خان د تړون له مواردو سرغړونه کړې، چې له امله يې تر پنځو کلونو پورې د اماراتو کرېکټ بورډ تر چتر لاندې په هېڅ سياليو کې برخه نشي اخیستلای.
