نوي زېلنډ د پاکستان خلاف د پنځو شل اوریزو سیالیو لپاره لوبډله اعلان کړه. د نوي زیلنډ لوبډله به د روانې میاشتې په اتلسمه نېټه له پاکستان سره دا لوبلړۍ پیل کړي، چې درې لوبې به په راولپنډۍ او دوه په لاهور کې ترسره شي.
د کرېکټ د نړۍوالې شورا د معلوماتو له مخې؛ نیو زیلنډ د پاکستان پر وړاندې دې پنځو شل اوریزو لوبو لړۍ لپاره تجربه لرونکی ال راونډر مایکل بریسویل د خپل کپتان په توګه ټاکلی.
۳۳ کلن بریسویل د تېر کال له مارچ راهیسې کومه نړۍواله لوبه نه ده کړې او په دې وروستیو کې د ټپي کېدو اندېښنو وروسته کورنیو لوبو ته راستون شوی.
بریسویل به په دې سفر کې د نیو زیلند د ځوانې لوبډلې مشري وکړي، نور لوبغاړي ټرینټ بولټ، ډیون کانوې، لاکي فرګوسن، مټ هینري، ډاریل مچل، ګلین فیلیپس، راچین رویندرا، سانټنر او ویلیمسن ای پي ایل سره د ژمنې له امله دې لوبو کې نشته.
ول ینګ، تیم ساودي، کولن منرو او ټیم لاتم هم د بېلابېلاو لاملونو له امله ټیم کې نه شته؛ خو تمه ده چې تکړه اوپنر توپ وهونکی فن ایلن، تجربه لرونکی الرونډر جیمي نیشام او تکړه سپینر ایش سودي له دوی سره یوځای شي.
د پاکستان لپاره د نیوزیلینډ لوبډلې کې مایکل بریسویل، فن ایلن، مارک چیپمن، جوش کلارکسن، جیکب ډفي، ډین فاکسکرافټ، بین لیسټر، کول مک کونچي، اډم میلن، جیمي نیشام، ویل او رورک، ټیم رابینسن، بین سیرز، ټیم سیفرټ، ایش سودي شامل دي.
د لوبو مهال ویش:
لومړۍ لوبه د اپریل په ۱۸مه، راولپنډۍ
دویمه لوبه د اپریل ۲۰مه، راولپنډۍ
درېیمه لوبه د اپریل ۲۱مه، راولپنډۍ
څلورمه لوبه د اپریل ۲۵مه، لاهور
پنځمه لوبه د اپریل ۲۷مه، لاهور
