د افغانستان کرېکټ بورډ وایي، د لومړي ځل لپاره یې د قوش تېپې په نوم شل اوره سیالۍ خپل کلنۍ پلان ته زیاتې کړې دي. د دې بورډ د کورني کرېکټ څانګه وايي، د قوش تېپې په نوم د لومړني پړاو ملي شل اوریزه سیالۍ به د راتلونکې اپریل میاشتې له ۱۶مې تر ۲۷مې په کندهار کې وشي.
د دې ادارې په خبرپاڼه کې د افغانستان د کرېکټ بورډ د کورني کرېکټ څانګې د مسوول نظیم جار عبدالرحیمزی په حواله لیکل شوي: «د قوش تپې جام ملي شل اوریزې سیالۍ د لومړي ځل لپاره د کورني کرکټ د سیالیو او ټورنمنټونو کلني پلان ته اضافه شوې دي.»
دغه سیالۍ د نړیوال جام لپاره د ملي لوبډلې د چمتووالي لپاره کیږي.
د قوش تپېې په دغو سیالیو کې به د زونونو په کچه پنځه لوبډلې ګډون کوي، چې په لړ کې به یې هره لوبډله له سیالې لوبډلې سره دوه ځلې مخ شي او ټولټال به د پایلوبې په ګډون ۲۱ لوبې ترسره کړي.
په خبرپاڼه کې
د دې خبرپاڼې له مخې، د کورني کرېکټ د پلان پر بنسټ به له دې وروسته د میرویس نیکه درې ورځنۍ سیالۍ، د احمدشاه ابدالي فرسټ کلاس سیالۍ، غازي امان الله خان لېسټ اې سیالۍ، شپږیزه کرکټ لیګ او زرغون افغانستان جام سیالۍ هم یو په بل پسې ترسره شي.
قوش تېپه د هغه کانال نوم دی چې له امو څخه افغانستان ته اوبه لېږدوي او طالبانو یې عملي چارې پیل کړې دي.
دا کانال ۲۸۵ کیلومتره اوږد، ۱۵۲ متره سورور او له ۸ تر ۱۲.۵ مترو ژور دی.
طالبان وايي، د دې کانال بشپړېدو سره به په بلخ، جوزجان او فاریاب کې پنځه نیم لکه هکتاره ځمکه خړوب شي.
د دې کانال پرانیسته د پخواني ولسمشر اشرف غني په وخت کې شوې وه، خو د طالبانو د ناامني له امله یې کارونه ځنډېدلي و.
که څه هم د افغانستان ګاونډي په تېره ازبکستان د دې کانال له جوړېدو اندېښنه لري، خو طالبان وايي، دا کانال به بشپړ کړي.
