د پاکستان کرېکټ بورډ وايي، بابر اعظم چې تېرکال د لړم په ۲۴مه یې د پاکستان د کرېکټ ملي لوبډلې له لوبډلمشرۍ استعفا کړې وه، یو ځل بیا یې د شل اوریزو او یو ورځنیو لوبو د لوبډلمشر په توګه ټاکلی.
د پاکستان کرېکټ بورډ د یکشنبې په ورځ د (وري ۱۲مه) په خپله اېکس پاڼه لیکلي چې، د غوراوي کمیټې د رایو ورکړې له لارې دغه بورډ بابر اعظم د پاکستان د شل اوریزو او یو ورځنیو لوبډلو د لوبډلمشر په توګه وټاکه.
بابر اعظم، داسې مهال د پاکستان د شل اوریزو او یو ورځنیو کرېکټ لوبډلو د لوبډلمشر په توګه وټاکه چې نږدې دوه میاشتې وروسته د امریکا او ویسټ اینډیز په کوربتوب د کرېکټ د شل اوریزو لوبو نړېوال جام ترسره کیږي.
له بابر اعظم وړاندې د پاکستان د کرېکټ ملي لوبډلې چټک توپ اچوونکی شاهین شاه اپریدی د شل اوریزو لوبو لوبډلمشر و.
بابر اعظم چې له شاهین شاه اپریدي مخکې د پاکستان د کرېکټ ملي لوبډلې د شل اوریزو، یو ورځنیو او ټېسټ درې واړو فارمټونو لوبډلمشر و تېر کال د لړم په ۲۴مه هغه مهال له لوبډلمشرۍ څخه استعفا وکړه چې لوبډلې یې د یو ورځنیو لوبو د نړېوال جام پر مهال له افغانستان، هند، سوېلي افریقا او اسټرالیا د کرېکټ لوبډلو څخه ماتي وخوړله.
