د افغانستان کرېکټ بورډ اوايي، له ۴ نويو افغان لوبغاړو سره یې مرکزي قراردادونه کړي او له پنځو پخوانيو لوبغاړو یې دا قراردادونه اخیستي دي. کرېکټ بورډ له «صدیق الله اتل، ضيا الرحمن اکبر، بهيرشاه محبوب او عبدالمالک سره نوي قراردونه کړي دي.
د افغانستان کرېکټ بورډ د چهار شنبې په ورځ په خپله فېسبوک پاڼه ليکلي، چې له پنځو پخوانيو لوبغاړو « دولت ځدران، شاپورځدران، سميع الله شينواري، افتاب عالم او محمد شهزاد» یې قراردادونه اخیستي دي.
کرېکټ بورډ ويلي، چې د نويو لوبغاړو د کرېکټ لاسته راوړنې يې د ۲۰۲۳ کال د جولای میاشتي څخه بيا تر ډسمبر میاشتي پوري څارلي او د خپلو اصولو له مخي یې ټاکلي دي.
کرېکټ بورډ ادارې ليکلي: «د لوبغاړو له لوري د مرکزي قرارداد ترلاسه کول او له لاسه ورکول د شپږ میاشتني راپور او د دوی کارکردګۍ له مخې کېږي.»
بورډ د نويو او پخوانيو لوبغاړو د قراردادونو په اړه نور جزيات ندي ورکړي.
پر فېسبوک د کرېکټ بورډ تر دې خبر وروسته ډېرو کرېکټ مينه والو په خپلو تبصرو کې که څه هم د بورډ دا پرېکړه ستايلې؛ خو پر دې ادارې يې نيوکه کړې، چې لا یې هم د موضوع اړوند بشپړ معلومات ندي شریک کړي.
افغانستان کرېکټ بورډ پر داسي مهال د نويو لوبغاړو سره قراردادونه کړي، چې د ۲۰۲۴ کال د کرېکټ شل اوريزه نړۍوالو سياليو ته څه باندي دوې مياشتي پاته دي.
د کرېکټ ډېری مينه والو زيات مهال پر بورډ ږغ کړی، چې په ملي لوبو کې دي ځوانانو ته ډېره برخه ورکول شي.
