د هندوستان د بهرنیو چارو وزارت د طالبانو هغه ګام ستایلی، چې له مخې یې د هندو باورو او سېکانو ولکه شوي جایدادونه بېرته هغوی ته سپارل کېږي. دغه وزارت په یوې خپرې شوې خبرپاڼه کې ویلي، چې دا یو مثبت ګام دی او دوی یې هرکلی کوي.
د طالبانو عدلیې وزارت د ځمکو د غصب پر وړاندې د مبارزې کمېسیون په نامه هڅې ګړندۍ کړې، چې د افغان هندوانو او سېکانو ولکه شوې ځمکې او کورونه له غاصبینو خلاص او بېرته یې دوی ته وسپاري.
تر دې وړاندې د افغان سېکانو ځیني مشران د خپلو خلکو د ولکه شویو جایدادونو د خلاصولو پر سر له طالبانو سره د خبرو لپاره کابل ته تللي وو.
که څه هم چې تر اوسه دا معلومه شوې نه ده، چې طالبانو د هندو باورو او سېکانو څومره جایدادونه له غصبه خلاص کړي؛ خو تر دې وړاندې داسې راپورونه وو، چې د هندوانو او سېکانو ډېر جایدادونه په کابل، ننګرهار، خوست، غزني، کندهار او پروان ولایتونو کې د زورواکو لهخوا ولکه شوي وو، چې تر ډېره دغه غاصبین د پخوانیو تنظیمونو جهادي قوماندانان او هغه زورواکي وو چې په تېرو نظامونو کې یې واک او ځواک لاره.
که څه هم چې هندو باوره او سېک افغانان تر ډېره په تېرو څلور لسیزو جګړو کې د افغانستان په بېلابېلو ولایتونو کې پاتې وو؛ خو له هغه مهاله چې طالبان د دویم ځل لپاره پر افغانستان واکمن شول، نو دغو خلکو د داعش د بریدونو له امله هېواد پرېښود او د هندوستان په ګډون نورو هېوادونو ته کډه شول.
د کوچني اختر لومړی لمونځ په ارګ کې د ریاست الوزرا د دوو مرستیالانو ملا برادر او ملا عبدالسلام حنفي په ګډون د طالبانو د کابینې د یو شمېر غړو او ځینو میلمو سره یو ځای ادا شوی دی.
دویم لمونځ په سپېدار ماڼۍ کې د طالبانو د ریاست الوزرا د سیاسي مرستیال په ګډون د لوړو زده کړو وزیر ندا محمد ندیم، د بهرنیو چارو وزیر امیرخان متقي او یو د طالبانو د کابینې د یو شمېر غړو سره یو ځای ادا شوی دی.
که څه هم طالبانو د دغو دوو بېلابېلو جماعتونو د ادا په اړه څه نه دي ویلي؛ خو د طالبانو تر کنټرول لاندې د ارګ د تشریفاتو یوې سرچینې افغانستان انټرنشنل - پښتو ته ویلي، چې د رییس الوزرا په نه شتون کې د ارګ تشریفاتو مولوي کبیر ته د اختر په لمانځه کې د ګډون پیغام لېږلی و؛ خو د هغه دفتر ورته د رد ځواب لېږلی.
سرچینه زیاتوي: "د مولوي کبیر له دفتره ورته ویل شوي وو، چې دوی غواړي د بهرنیو هېوادونو له سفیرانو سره یو ځای لمونځ وکړي او نه شي کولی، چې د ارګ د اختر په لمانځه کې ګډون وکړي".
په ارګ کې په جماعت د اختر د دواړو لمونځونو تر منځ یوازې ۱۵ دقیقې توپیر و؛ چې د سپېدار ماڼۍ د اختر په لمانځه کې مولوي کبیر وینا کړې او د ارګ داخل لمانځه کې د ملا برادر او عبدالسلام حنفي په ګډون د طالبانو یو شمېر چارواکو خبرې کړې دي.
په ارګ کې د اختر دوه لمونځونه پر داسې مهال کیږي، چې له اختر وړاندې د طالبانو حج او اقافو وزارت د جوماتونو له ټولو ملا امامانو څخه غوښتي وو، چې د اختر لمونځونه په هرې سیمې کې باید په یو ځای او پر یو وخت وکړي.
دا لومړی ځل دی، چې په ارګ کې د اختر دوه بېلابېل لمونځونه کیږي او د ریاست الوزرا مرستیالان پر یو ځای له لمانځه ډډه کوي.
د طالبانو یو شمېر سیاسي مخالفینو دا چاره د طالبانو په کابینه کې د خپل منځي اختلافاتو یو روښانه مثال ګڼلې ده.
