ډېلي میل ورځپاڼې د یو لړ اسنادو له مخې لیکلي، چې د امریکا د بهرنیو چارو وزارت سلاکار درک شولت، د کانګرس د بهرنیو اړیکو کمېټې ته «سل ځلې» ویلي چې له افغانستانه د امریکايي ځواکونو د وتو په اړه یې جزییات په یاد کې نه دي پاتې. هغه د ۱۴۰۲ کال د لېندۍ په ۲۸ نېټه کانګرس ته وربلل شوی و.
بریتانوي ورځپاڼې ډېلي میل د پنجشنبې په ورځ (د وري په ۲۳مه) د کانګرس د بهرنیو اړیکو د کمېټې د مشر مایکل مکال د هغه لیک جزییات خپاره کړل، چې ښاغلي مکال د درک شولټ د څېړنو له مخې لیکلي و.
مایکل مکال له افغانستانه د امریکایي ځواکونو د وتو په بڼه څېړنه کوي او په دغه بهیر کې د امریکا له یوشمېر سیاسي او پوځي چارواکو څخه د کانګرس د بهرنیو چارو په کمېټه کې پوښتنې ګروېږنې کوي.
د ښاغلي مکال د لیک پر بنسټ، د ۱۴۰۲ کال د لېندۍ میاشتې په ۲۸مه درک شولټ د کانګرس د بهرنیو چارو کمېټې ته د شهادت ورکولو لپاره حاضر شو.
ښاغلي مکال په لیک کې لیکلي، چې د امریکا د بهرنیو چارو وزارت سلاکار درک شولټ یې له افغانستانه د امریکایي ځواکونو د وتو په اړه د تړلو دروازو تر شا پوښتنو ګروېږنو ته کېناوه؛ خو د انتوني بلېنکن دغه سلاکار سل ځله د پوښتنو په ځواب کې وویل، چې له افغانستانه د امریکايي ځواکونو د وتو په اړه یې څه شی په یاد نه دي پاتې.
د کانګرس د بهرنیو اړیکو مشر ویلي، چې هغه د نوموړي سلاکار پر چارو نظر لاره او هغه د افغانستان د سولې په بهیر کې ښکېل و او څو، څو ځلې یې د افغانستان په اړه په مهمو غونډو کې هم برخه لرله؛ خو هغه د کانګرس د بهرنیو اړیکو په کمېټه کې د جزییاتو له ورکولو ډډه کوله.
د کوچني اختر لومړی لمونځ په ارګ کې د ریاست الوزرا د دوو مرستیالانو ملا برادر او ملا عبدالسلام حنفي په ګډون د طالبانو د کابینې د یو شمېر غړو او ځینو میلمو سره یو ځای ادا شوی دی.
دویم لمونځ په سپېدار ماڼۍ کې د طالبانو د ریاست الوزرا د سیاسي مرستیال په ګډون د لوړو زده کړو وزیر ندا محمد ندیم، د بهرنیو چارو وزیر امیرخان متقي او یو د طالبانو د کابینې د یو شمېر غړو سره یو ځای ادا شوی دی.
که څه هم طالبانو د دغو دوو بېلابېلو جماعتونو د ادا په اړه څه نه دي ویلي؛ خو د طالبانو تر کنټرول لاندې د ارګ د تشریفاتو یوې سرچینې افغانستان انټرنشنل - پښتو ته ویلي، چې د رییس الوزرا په نه شتون کې د ارګ تشریفاتو مولوي کبیر ته د اختر په لمانځه کې د ګډون پیغام لېږلی و؛ خو د هغه دفتر ورته د رد ځواب لېږلی.
سرچینه زیاتوي: "د مولوي کبیر له دفتره ورته ویل شوي وو، چې دوی غواړي د بهرنیو هېوادونو له سفیرانو سره یو ځای لمونځ وکړي او نه شي کولی، چې د ارګ د اختر په لمانځه کې ګډون وکړي".
په ارګ کې په جماعت د اختر د دواړو لمونځونو تر منځ یوازې ۱۵ دقیقې توپیر و؛ چې د سپېدار ماڼۍ د اختر په لمانځه کې مولوي کبیر وینا کړې او د ارګ داخل لمانځه کې د ملا برادر او عبدالسلام حنفي په ګډون د طالبانو یو شمېر چارواکو خبرې کړې دي.
په ارګ کې د اختر دوه لمونځونه پر داسې مهال کیږي، چې له اختر وړاندې د طالبانو حج او اقافو وزارت د جوماتونو له ټولو ملا امامانو څخه غوښتي وو، چې د اختر لمونځونه په هرې سیمې کې باید په یو ځای او پر یو وخت وکړي.
دا لومړی ځل دی، چې په ارګ کې د اختر دوه بېلابېل لمونځونه کیږي او د ریاست الوزرا مرستیالان پر یو ځای له لمانځه ډډه کوي.
د طالبانو یو شمېر سیاسي مخالفینو دا چاره د طالبانو په کابینه کې د خپل منځي اختلافاتو یو روښانه مثال ګڼلې ده.