د امریکا د فېډرالي څېړنو څانګې ایف بي ای د دوشنبې په ورځ ویلي، چې تېره میاشت د بالټیمور پل د وژونکي پېښې په اړه یې جرمي تحقیقات پیل کړي. په دغه پېښه کې یوه بار وړونکې بېړۍ د پله له یوې پایې سره ولګېده او ټول پل یې رانسکور کړ.
د ایف بي ای یوه ویاند رویټرز خبري اژانس ته وویل، چې ددغې ادارې اجنټانو ته د پېښې د څېړلو په اړه د محکمې له خوا اجازه ورکړل شوې او دوی د څېړنو لپاره دغې بېړۍ ته ننوتي دي.
دغې ادارې په دې اړه د نورو معلوماتو له ورکولو ډډه کړې ده.
د مارچ په ۲۶ مه سهار وختي مهال دغې د کانټرینرونو لېږدونکې لویې بېړۍ د تخنیکي ستونزو له امله برېښنا له لاسه ورکړه او بېړۍ له پله سره وجنګیده.
فرانسیس سکاټ کې پل د پټومک سیند ته وغورځید او شپږ کسان یې ووژل چې د پله د نسکورېدو پر مهال یې هلته کار کاوه.
د واشنګټن پوسټ ورځپاڼې د دوشنبې په ورځ راپور ورکړ، چې د پله د نسکورېدو په اړه تحقیقات به په دې برخه کې تمرکز وکړي، چې د بېړۍ عملې مخکې له دې چې بندر پرېږدي، په دې پوهیدل چې بېړۍ جدي تخنیکي ستونزه لري او که نه.
