د طالبانو د چارو ادارې رییس د دې ډلې له چارواکو او غړو غوښتي، چې د بيت المال اجناس او وسایط په شخصي چارو کې مصرف نه کړي.
نورالحق انور ټولو طالبانو ته سپارښتنه کړې ده، چې د بیت المال ساتنې ته دې ځانګړې پاملرنه وکړي.
د طالبانو تر واک لاندې په ارګ کې د چارو ادارې نن په خپل اېکس کې لیکلي، چې په اوونیزه ناسته ددې ادارې د مشر نورالحق انور په مشرۍ ترسره شوه.
په دغه ناسته کې د طالبانو د چارو ادارې مشر ويل چې کارکوونکي بايد په دفترونو او کارځیو کې د برېښنا د بېځايه لګښت مخنيوی وکړي او په وينا يې چې د بيت المال ضايع د ګناه لامل کيږي چې بايد ځان ترې وساتل شي.
دا څرکندونې په داسې حال کې کیږي، چې د اختر په شپو او ورځو کې د طالبانو یو شمیر پلویانو د خپلې ډلې پر کسانو نیوکې وکړې، چې د اختر د خوښیو پرمهال په دولتي موټرو کې یو شمیر ولایتونو ته په چکر لاړ دي.
دوی دا کار د بیت المال سره خیانت بللی دی.
په دې وروستیو ورځو کې ویډیوګانې ښيي چې د پخواني امنیتي ځواکونو نظامي وسایط چې اوس مهال د طالبانو په کنټرول کې دي، د بې احتیاطۍ له امله په اوبو کې ډوب شوي دي.