د افغانستان لومړۍ ترانزیټي اورګاډی، چې د ترکیې په لور روان و، په ایران کې درول شوی دی. ایلنا خبري اژانس د خپلو سرچینو په حواله راپور ورکړی، چې په دغه اورګاډي کې ۱۱۰ مټریک ټنه معدني ډبره بار وه، چې د ایران د روزنک اورګاډي تمځایه کې ودرول شوی؛ خو د تېرېدو اجازه نه ده ورکړل شوې.
د ایران خبري اژانس (ایلنا) د یکشنبې په ورځ د (غويي ۲مه) په خپل نشر شوي راپور کې ليکلي، چې د ایران له لوري د افغانستان ترانزيټي اورګاډی د بندېدو لامل تر اوسه معلوم ندی.
د ايلنا په راپور کې راغلي، چې « د ایران د اروګاډي د شرکت اجرايوي مشر میاد صالحي ادعا کوي، چې د ريل ټرانزيټ زياتوالی د لومړيتوبونو په سر کې دي؛ خو ويل کيږي، چې د نامعلومو دلایلو له امله د خواف – هرات د اورګاډي لومړۍ ترانزيټي اورګاډی او لومړۍ رسمي پټلۍ د روزنک په تمځای کې درول شوی او ایران دغه اورګاډي ته د خپل تګ راتګ د دوام لپاره لوکوموټيو اورکاډي ته نه دي ورکړی.»
ايلنا د یوې باخبرې سرچینې په حواله لیکلي دي، چې د دې اورګاډي د تېرېدو د نه پرېښودلو لامل "مالي مسایل" دي.
د طالبانو د ریل پټلۍ ادارې دوه ورځې وړاندې اعلان وکړ، چې د لومړي ځل لپاره د رېل پټلۍ له لارې د ترکیې مرسینګ ښار ته ۱۱۰۰ مټریک ټنه معدني ډبره صادره شوه.
دغه اداره زياتوي، چې په دې ډبرو کې د تالک یا شوکاڼي ډبره شامله ده.
طالبان وايي، افغانستان دا مهال له ایران او ترکمنستان سره د اورګاډي له لارې نښلول شوی او هره ورځ له دې لارې سلګونه ټنه سوداګریز توکي صادریږي او واردېږي.
