د طالبانو د چاپېریال ساتنې ادارې او د افغانستان لپاره د ناروې کمېټې په ګډه همکارۍ د اقلیمي بدلون په تړاو درې ورځنی بحث پیل کړی.
طالبان وايي افغانستان د اقلیمي بدلون یو له اغېزمنو هېوادونو دی او په تېره یوه اونۍ کې د سېلابونو له امله د ۱۱۱ کسانو مړه کېدل یې څرګند اغېز دی.
د طالبانو د چاپېریال ساتني اداره وايي، د افغانستان لپاره د ناروې کمېټې په ګډه همکارۍ د دوشنبې په ورځ د (غوايي درېیمه) د افغانستان د اقلیم په اړه درې ورځنی بحث پیل کړ.
دغه اداره وايي، چې په یاد بحث کې د یو شمېر وزارتونو استازو، د بهرنیو هېوادونو استازو، د پوهنتون استادانو، د موسسو استازو او متخصصانو ګډون کړی دی.
د طالبانو د چاپېریال ساتنې ادارې مسلکي او د پالیسۍ معین زین العابدین عابد وايي، نړېوال دې د اقلیمي بدلون د مبارزي لپاره له سیاسي مسایلو پرته خپلو مالي او تخنیکي مرستو ته دوام ورکړي.
نوموړی زیاتوي چې افغانستان د اقلیمي بدلون په رامنځته کولو کې ډیر لږ رول لري، خو د اوبو، کرنې، ځنګلونو، انرژۍ، شنو ځمکو، څړځایونو، او نورو برخو کې یې ډیر زیان لیدلی.
د طالبانو د چاپېریال ساتنې ادارې مرستیال په خپلو خبرو کې وايي، چې د طبیعي پېښو او سېلابونو له امله په تېرو څو ورځو کې ۱۱۱ کسان مړه شوي، ۷۱ نور ټپیان شوي،۲۰۱۷ څاروي مړه، ۹۸۳۸۶ جریبه ځمکه، ۲۷۰۷ کورونه او ۲۴۲۴ سربندونه ویجاړ شوي دي.
هغه وړاندې وايي، پرله پسي وچکالۍ، سېلابونه، د اوبو او کرنیزو محصولاتو کمښت د خلکو لپاره ډیرې ستونزې جوړې او ژوند یې له ګواښونو سره مخ شوی.
د طالبانو د چاپېریال ساتنې اداره وايي، افغانستان یو له هغو شپږو هېوادونو څخه دی چې اقلیمي بدلون له امله تر ټولو زیات زیان ویني او منفي نتایج تجربه کوي.
طالبان وايي، د اقلیمي بدلون سره د مبارزي په برخه کې یې د اوبو د سرچینو مدیریت، کرنه، د ځنګلونو او شنو ځمکو بیارغونه او د نوي کېدونکي انرژۍ په برخو کې یې پروګرامونه پیل کړي دي.