د ایران ولسمشر وايي؛ ملګرو ملتونو او د بشري حقونو نورو سازمانونو «خپل اغېز له لاسه ورکړی او امنیت شورا خپله دنده نه ترسره کوي.» ابراهیم رییسي په اسلام اباد کې د پاکستان له لومړي وزیر سره په یوه ګډه خبري غونډه کې وویل، دې مسالې د نړۍ خلک «تنګ» کړي دي.
د ایران ولسمشر ابراهیم رییسي د دوشنبې په ورځ د (غوايي ۳مه) اسلام اباد ته د خپل سفر په ترڅ کې د پاکستان له لومړي وزير شهباز شریف سره په ګډه خبري غونډه کې د غزې په تړانګه کې جګړې ته په اشارې سره وویل: « د فلسطین خلک له نسل وژنې او ماشوم وژنې څخه چې د امریکا او لویدیځو هېوادونو په ملاتړ د اسراییل له خوا ترسره کیږي ستړي شوي دي.»
د دغه سفر په ترڅ کې د دواړو هېوادونو ترمنځ د امنیتي او بشري سرچینو په ګډون په بېلابېلو برخو کې د همکاریو اته سندونه لاسلیک شول.
د ایران ولسمشر په خپلو خبرو کې د پاکستان او ایران ترمنځ د سوداګریزو اړیکو کچه د «نه منلو وړ» وبلله او ویې ویل، چې ایران به د خپلو سوداګریزو اړیکو کچه ۱۰ میلیارده ډالرو ته لوړه کړي.
ابراهیم رییسي وویل؛ ایران له پاکستان سره اوږده پوله د یوه «فرصت» په سترګه ګوري او د ګډ بازار پر جوړولو یې ټینګار کړی دی.
هغه وویل: «ایران ظالمانه بندیزونه په فرصتونو بدل کړل او له دغو فرصتونو څخه یې د هېواد د پرمختګ لپاره استفاده وکړه. موږ چمتو یو چې خپلې تجربې د پاکستان له خلکو سره شریکې کړو.»
په دغه کتنه کې د پاکستان لومړي وزیر شهباز شریف د غزې په اړه د ایران د دریځونو ستاینه وکړه او له اسلامي هېوادونو یې وغوښتل، چې په دې لاره کې سره یو شي.
د ایران ولسمشر ابراهیم رییسي د پاکستان د بهرنیو چارو له وزیر سره هم وکتل او ټاکل شوې، چې د دوشنبې په ماښام د پاکستان له ولسمشر او نورو چارواکو سره وګوري او مجلسونه وکړي.
اسرايیلي ځواکونو د جمعې په سهار د فلسطین د طولکرم ښار ته څېرمه د نور شمس په سیمه کې پراخ بریدونه پیل کړل او تر شنبې ورځې پورې له وسله والو جنګیالیو سره په نښتو کې ښکیل وو.
په سیمه کې د اسراییل پوځي ګاډي لیدل شوي او د ډزو غږونه اوریدل شوي، په داسې حال کې چې لږ تر لږه درې بې پیلوټه الوتکې هم په اسمان کې لیدل شوي، چې د نور شمس سیمې په اسمان کې ګرځيدلې.
نور شمس هغه سیمه ده، چې د ۱۹۴۸ د جګړې څخه وروسته کډوال او د دوی اولادونه په کې استوګن شوي.
اسراییل له دغې جګړې وروسته رامنځته شو.
د طولکرم لېوا چې د ګڼ شمېر فلسطیني ډلو څخه جوړه ده، ویلي یې دي، چې د دوی جنګیالیو د شنبې په ورځ له اسراییلي ځواکونو سره نښتې کړي دي.
لویدیځه غاړه د پښتورګو په شکل یوه سیمه ده چې شاوخوا ۱۰۰ کیلومتره اوږدوالی او ۵۰ کیلومتره پلنوالی لري، چې د ۱۹۶۷ کال د منځني ختیځ په جګړه کې د اسراییل له خوا د نیولو راهیسې د اسراییل او فلسطین د شخړې په زړه کې پرته ده.
د غزې جګړې په دغه سیمه کې د اسراییلي ځواکونو له خوا پر جنګیالیو ترسره کېدونکي بریدونه، د فلسطین په کلیو کې د یهودي مېشتو خلکو له خوا تاوتریخوالی او په سړکونو کې پر اسراییلي ځواکونو د فلسطینیانو پرله پسې بریدونه تر سیوري لاندې راوستی دی.
په دغه سیمه کې د غزې د جګړې له پيل راهيسې د اسراييلي پوځ او پوليسو په منظمو عملياتو کې په زرګونو فلسطينيان نيول شوي او په سلګونو وژل شوي دي، چې زياتره يې د وسله والو ډلو غړي دي.
په دغو نیول شویو کسانو کې ملکي وګړي او هغه ځوانان هم شامل دي چې په اسراییلي ځواکونو د تیږو بریدونه کوي.
د شنبې په ورځ د فلسطین روغتیایي چارواکو وویل، چې لږ تر لږه ۱۴ فلسطینیان چې دوه یې د فلسطیني سرچینو او چارواکو له خوا د سوله والو په توګه پېژندل شوي او یو یې ۱۶ کلن هلک و، د اسراییلي ځواکونو د برید په ترڅ کې وژل شوي.
دغه برید په تېره یوه اونۍ په لویدیځه غاړه کې تر ټولو لوی برید بلل کیږي.
د اسراییل پوځ ویلي، چې د برید په ترڅ کې یو شمېر وسله وال وژل شوي او یو شمېر نور نیول شوي دي.
په دغه نښتو کې د څلورو اسراییلي پوځيانو د ټپي کېدو خبر هم ورکړل شوی دی.
د فلسطین د روغتیا وزارت ویلي دي، چې په یوه بله پېښه کې د امبولانس یو پنځوس کلن چلوونکی د نابلس ښار په سویل کې هغه مهال د اسراییلي ځواکونو په ډزو کې ووژل شو، چې د ټپیانو د لیږدولو په حال کې وو.
