د ایران ولسمشر امر کړی، چې د پولو د بندولو لپاره دې د دغه هېواد د وسله والو ځواکونو لوی درستیز ته ۳ میلیارده یورو ورکړل شي.
د ایران د کورنیو چارو مرستیال وزیر مجید میراحمدي وايي، د افغانستان د پولې په ګډون د هغو لارو بندولو ته اولیت ور کول کېږي چې خلک او وسلې پرې قاچاق کېږي.
د ایراني رسنیو د راپورونو له مخې ښاغلي احمدي د دې پروګرام په اړه وویل، چې د سرحدونو بندول یو پراخ پلان دی، چې په څو مرحلو کې ترسره کیږي؛ د کټارو او دیوالونو ترڅنګ د سرحد کنټرولولو پرمختتلي ټیکنالوجیک سیسټمونه هم جوړېږي.
هغه وویل چې ابراهیم رییسي د پولو د بندولو موافقه وکړه او امر یې وکړ چې وسله وال ځواکونه دې په پنځو کلونو کې دننه د پولو د بندولو پروسه پیل کړي.
د ایران د اسلامي جمهوریت د کورنیو چارو د وزارت امنیتي مرستیال وویل، ایران د امنیت د ټینګښت او د انسان او وسلو د قاچاق د مخنیوي په هدف پر خپلو پولو دیوالونه جوړوي.
دغه جګپوړي امنیتي چارواکي ویلي، چې هر کال له ۲۰ میلیاردو ډالرو څخه زیات قاچاقي توکي ایران ته داخلیږي او یا بهر ته ځي.
ښاغلي احمدي ټینګار وکړ، چې د نشه یي توکو قاچاق او هغه ناامني چې ایران ور سره مخ دی ټول د یوې بنسټیزې پانګونې له لارې د پولو په بندولو سره حل کیدای شي.