پخوانی ولسمشر چې له طالبانو بیا بیا د نجونو د زدکړو پیلېدل غواړي د دوی د تعلیم لپاره یې د اروپايي ټولنې د ډېرو همکاریو غوښتنه وکړه.
حامد کرزي د اروپايي کمېسون د اسیا او منځني ختیځ د څانګې له مشر او په افغانستان کې د اروپايي ټولنې له شازدافیرې سره لیدنه کې دا غوښتنه کړې ده.
ښاغلي کرزي پرون د اروپايي کمېسون د اسیا او منځني ختیځ د څانګې له مشر پیټریس اوستبس او په افغانستان کې د اروپايي ټولنې له شازدافیرې رافایلان یودیچه سره لیدنه کې له افغانانو سره د دې ټولې د بشري مرستو مننه هم کړې، خو زیاته کړې یې ده چې دا ټولنه د مور او ماشوم د پاملرنې او روغتیا لپاره هم خپلې مرستې وکړي.
نوموړي څو ورځې مخکې د ایران له استازي سره لیدنه کې هم د افغان نجونو زدکړې د ټولنې لپاره مهمې بللې وې.
د طالبانو په واکمنېدو سره دې ډلې له شپږم ټولګي د پورته نجونو زدکړې بندې کړې او تېر کال یې د نجونو پوهنتوني زدکړې او د ښځو کار هم بند کړ.
که څه هم دا ډله وايي چې د ښځو د زدکړو او کار لپاره ځانګړې طرحه جوړوي، خو د کلونو تېرېدو سره د طرحې نه جوړېدو افغانان اندېښمن کړي چې ښايي دا ډله به هیڅکله هم د نجونو زدکړو او کار ته اجازه ور نه کړي.