د طالبانو په واک کې باختر اژانس وايي، د دې ډلې د کډوالو او ستنېدونکو چارو وزير د غوايي د ۸ په مناسبت غونډه کې وويل هغه « دوښمن، چې د شوري یرغل په وړاندې تر بریا وروسته یې مجاهدين په بېلابيلو نومونو» بيل کړل اوس هم په کمين کې ناست دی او د افغانانو د وېشلو هڅې کوي.
د خلیل الرحمان حقاني په خبره،: «مجاهدين ځکه ناکام شول، چې یو واحد بيرغ او مشر يې نه درلود.»
حقاني په دې غونډه کې خپلو پلويانو ته په خبرو کې زياتوي، چې د شوري اتحاد تر ماتې او له افغانستان د وتلو وروسته دوی داسې کړۍ وروزلې، چې کلونه يې افغانانو ته «جنګ او بدبختي» په ميراث پرېښول.
نوموړی وايي، د شوري اتحاد په وړاندي د «مجاهدينو» قربانۍ د هېرولو نه دي او په تېرو دوو دورو کې تر ټولو لويه قرباني ښځو او ماشومانو ورکړې ده.
نوموړي وايي، چې بهرنیانو داسي تنظیمونه جوړ کړل، چې وطن ته وفادار نه ول او یوازي يې خپلي او د تنظيم ګټي خوندي کولې.
طالب مشرانو تر دې وړاندي هم پر خپلو ملګرو او پلويانو د يوالي ږغ کړی او غوښتنه يې ترې کړې، چې د پرديو دسیسو ښکار نه شي، په خپلو منځونو کې همږغي رامنځ ته کړي او د خپل مشر امر ومني.
په افغانستان کې د غويي د ۷مې او ۸مې ورځو په پار د طالبانو لهخوا په خپره شوې اعلامیه کې راغلي، چې دوی د غويي ۷مه د تورې ورځې په نامه غندي او د غويي ۸مه د هېواد د خپلواکۍ د ورځې په نامه نمانځي.