د ملي مقاومت جبهې په کابل او هرات کې د شپږو طالبانو د وژلو خبر ورکړی
د ملي مقاومت جبهه وايي، د شنبې په ماښام د کابل ښار په شپږمه امنیتي حوزه کې د طالبانو دوه غړي د دوی د ځواکونو په برید کې وژل شوي دي.
د ملي مقاومت جبهه وايي، د شنبې په ماښام د کابل ښار په شپږمه امنیتي حوزه کې د طالبانو دوه غړي د دوی د ځواکونو په برید کې وژل شوي دي.
دغه جبهه همداراز وايي، چې د هرات او کابل په ښارونو کې د دوی د ځواکونو په دوو نورو بریدونو کې څلور طالبان وژل شوي او درې نور ټپیان دي.
د دغې جبهې د معلوماتو له مخې، دغه برید د شنبې په ماښام ترسره شوی، چې په ترڅ کې یې ملکي وګړو او د مقاومت ځواکونو ته کوم زیان نه دی اوښتی.
د ملي مقاومت جبهې، چې د دغه برید انځور یې هم پر اېکس ټولنیزې شبکې خپور کړی، ویلي چې دغه دوه طالبان چې په موټر سایکل سپاره وو او د خلکو ځورونه یې کوله، د کابل ښار د شپږمې امنیتي حوزې اړوند د چهاردهي سړک په سیمه کې په نښه شوي دي.
دغه جبهه وايي، په تېرو ۲۴ ساعتونو کې یې درې ځله پر طالبانو بریدونه کړي دي. دغې جبهې په خپله اعلامیه کې لیکي: په دوو نورو بریدونو کې چې د جمعې په ماښام او د شنبې پر سهار په کابل او هرات کې ترسره شوي، څلور طالبان وژل شوي او درې نور ټپیان دي.
