په بدخشان ولایت کې د طالبانو لوی درستیز فصیح الدین فطرت او د اعتراض کوونکو د استازو تر منځ خبرې بې نتیجې پای ته ورسېدې. سیمه ییزو سرچینو افغانستان انټرنشنل ته ویلي، چې د درایم او ارګو ولسوالیو اعتراض کوونکو د فصیح الدین فطرت وړاندیزونه رد کړي دي.
اعتراض کوونکو له طالب چارواکو سره د کتنې پر مهال له بدخشان څخه د وسله والو طالبانو د اېستلو او د درایم او ارګو د دوو اوسېدونکو قاتلینو ته د سزا ورکولو پر خپلو غوښتنو ټینګار وکړ.
تر دې مخکې سرچینو افغانستان انټرنشنل ته ویلي وو، چې فصیح الدین فطرت چې د طالبانو له خوا د بدخشان د اعتراضونو د کمېسیون مشر ټاکل شوی، وړاندیز کړی چې د بدخشان د اوسېدونکو د قاتلینو د سزا پر ځای دې د قربانیانو کورنیو ته پیسې ورکړل شي.
خو د لاريون کوونکو استازو دغه وړانديز رد کړ او د وژنې عاملينو ته يې د سزا غوښتنه وکړه.
