له کندهار څخه سرچينو افغانستان انټرنشنل ـ پښتو ته ويلي، چې په شاولي کوت ولسوالۍ کې د يو کس جسد په ونه کې ځړېدلی موندل شوی او یو بل کس د کندهار په پنځمه حوزه کې په ډزو وژل شوی دی.
سرچینو د دوشنبې په ورځ افغانستان انترنشنل ـ پښتو ته وویل، چې د شاولي کوټ ولسوالۍ په ښکته سوزنيانو کلي کې د نورمحمد په نوم د یو کس جسد چې په ونه کې ځړولی شوی و موندل شوی دی.
دغه کس اصلي د ارغنداب ولسوالۍ د خواجه ملک سیمې اوسیدونکی دی؛ خو د وژنې انګېزه يې لا تر اوسه معلومه نده.
سرچينې افغانستان انټرنشنل ته پر ونه د هغه د ځړوند جسد تصوير هم لېږلی دی.
د يوې بلې سرچينې د معلوماتو له مخې؛ نن دوشنبه د کندهار په پنځمه حوزه کې يو بل کس په ډزو ويشتل شوی او وژل شوی دی.
سرچينه وايي، چې ځايي طالبانو د دې کس د وژنې په تور څلور کسان نيولي دي.
نيولو شویو په خپلو خبرو کې ويلي، چې وژل شوي کس خپله ځان په تومانچه ويشتلی او وژل شوی دی.
په کندهار کې طالبانو تر اوسه د دې پېښو او د وژل شويو کسانو د هويت او کار په اړه معلومات نه دي شریک کړي.
په کندهار کې مرموزي او هدفي وژنې زيات شوي او ښاریان يې هم له اندېښنو سره مخ کړي دي.
د کندهار اوسېدونکي دا ډول پېښې د طالبانو د انتقامي وژنو یوه برخه يادوي.
