په کندهار کې د زدهکوونکو کورنۍ شکایت کوي، چي په ښوونیزو مرکزونو کې یې اولادونه د ښوونکو له لوري وهل کیږي او ماشومانو یې د زدهکړو روحیه له لاسه ورکړې. دوی وايي، ښوونکي او ملایان یې واړه په لښتو او کېبلونو وهي او سختې سزاګانې ورکوي.
له دغه ولایت څخه د ځینو ماشومانو کورنیو افغانستان انټرنشنل ـ پښتو ته ویلي، چې په ښوونځیو او مدرسو کې د ښوونکو او ملایانو له لوري د دوی له ماشومانو سره بد چلند کیږي.
د ماشومانو کورنۍ چې د طالبانو له ډاره نه غواړي خپل هویت څرګند کړي وايي؛ ماشومان یې په ښوونځیو او مدرسو کې د ښوونکو او ملایانو له لوري په ډیره بې رحمۍ ډبول کیږي. «زوی مې اوه کلن دی په کندهار ښار کې د نعمانیه په نوم مدرسې ته د دیني زدهکړو لپاره ځي خو څو ورځې مخکې مې زوی د مدرسې له تګه انکار کاوه ویل یې چې د مدرسې ملا ډیره سخته سزا ورکړې، کله چې مې د زوی بدن ولید نو په ډیره بې رحمۍ په لښتو او کیبل وهل شوی و.»
همدارنګه د کندهار یوه بل اوسېدونکی چې نه غواړي نوم یې دلته ذکر شي وايي:«زما زامن زه په ډیرې سختۍ مدرسې او ښوونځي ته استوم هغوی د ښوونځي او مدرسې له نوم اخیستلو ډاریږي وايي زموږ ښوونکي موږ ته سختې سزاګانې راکوي.»
د کندهاريو ماشومانو کورنۍ وايي په دغه ولایت کې د طالبانو د پوهنې ریاست ته یې په ځلونو د خپلو اولادونو شکایتونه کړي خو تر اوسه پورې هغوی په دې اړه هیڅ ګام نه دی اخیستی.
په کندهار ولایت کې یو شمېر کورنۍ وايي، په ښوونځیو او مدرسو کې د ښوونکو او ملایانو له لوري ماشومانو ته د سختو سزاګانو په ورکولو سره یې ماشومانو ته روحي ستونزې پیدا شوې دي.
