حنفي: د صنعت پیاوړتیا په هېواد کې د کارموندنې لپاره ځانګړی اهمیت لري
د طالبانو د ریاست الوزرا اداري مرستیال وایي، چې د صنعت برخه په ملي ناخالص تولید کې مهم رول او د صنعت پیاوړتیا په هېواد کې د کارموندنې لپاره ځانګړی اهمیت لري.
د طالبانو د ریاست الوزرا اداري مرستیال وایي، چې د صنعت برخه په ملي ناخالص تولید کې مهم رول او د صنعت پیاوړتیا په هېواد کې د کارموندنې لپاره ځانګړی اهمیت لري.
عبدالسلام حنفي نن د صنعت اونۍ ملي او نړۍوال نندارتون کې چې د صنعت او سوداګرۍ وزارت له لوري جوړ شوی و په خبرو کې زیاته کړه: "دا ډېره مهمه ده چې د یو هېواد صنعت د کیفیت او قېمت له نظره سیالي وکړای شي."
د طالبانو ریاست الوزرا د یوې خبرپاڼې په خپرولو سره د ښاغلي حنفي له قوله ویلي، چې افغانستان د صنعتي تولیداتو لپاره مهم او غني عوامل لري، چې کولای شي په سیمه کې په یوه مهم صنعتي مرکز بدل شي.
د نوموړي په خبره، په هېواد کې د صنعت د ودې لپاره د کار مناسب چاپېریال، نوې علمي ټکنالوژۍ او نوښت او نوي متخصص کاري ځواک ته لاسرسی مهم دی.
عبدالسلام حنفي د طالبانو له خوا د تېرو کلونو په ترڅ کې د مالیاتي معافیتونو وضع کولو ته په اشارې سره وویل، چې دغه ډله به د صنعت د پیاوړتیا او د افغانستان د اقتصادي ودې لپاره هر ډول اسانتیاوې سوداګرو او صنعتکارانو لپاره برابرې کړي.
نوموړي د صنعت اونۍ ملي او نړۍوال نندارتون کې د وینا پرمهال دغه راز په بغلان او یو شمېر نورو ولایتونو کې د وروستیو سېلابونو د قربانیانو له کورنیو سره غمشریکي وکړه او پر ټولو شتمنو او سوداګرو یې غږ وکړ، چې تر خپل وس پورې له زیانمنو سره مرستې وکړي.
