سېلاب ځپلو ته د ترکیې د مرستو لومړۍ جوپه سبا افغانستان ته رسېږي
په کابل کې د ترکیې سفیر د طالبانو د اقتصاد له وزیر سره په کتنه کې ویلي، چې د دغه هېواد د مرستو لومړۍ جوپه به سبا ته افغانستان ته ورسېږي.
په کابل کې د ترکیې سفیر د طالبانو د اقتصاد له وزیر سره په کتنه کې ویلي، چې د دغه هېواد د مرستو لومړۍ جوپه به سبا ته افغانستان ته ورسېږي.
په کابل کې د ترکیې سفارت نن په خپل اېکس کې لیکلي، چې جنک اونال له دین محمد حنیف سره په خبرو کې ویلي، چې د دغه هېواد د مرستو لومړۍ جوپه ۲۰ ټنه ده.
ښاغلي اونال زیاته کړې؛ ټاکل شوې چې له دغه هېواد څخه تر راتلونکو ورځو د خوراکي او غیرې خوراکي توکو په ګډون ۶۵۰ ټنه بشري مرستې هم د تورغونډۍ بندر له لارې سېلاب ځپلو ته راولېږدول شي.د یو بل خبر له مخې؛ د جاپان د بهرنیو چارو وزارت هم د افغانستان له سېلاب ځپلو سره د بېړنیو مرستو د ترسره کېدو خبر ورکړی.د جاپان په مرستو کې خیمې، کمپلې او نور لومړني توکي شامل دي، چې د جایکا سازمان له خوا به زیانمنو کسانو ته ووېشل شي.دا په داسې حال کې ده، چې دوه ورځې وړاندې د طالبانو د کډوالو چارو وزارت هم ویلي وو، چې د بغلان په سېلاب کې د هر مړه کس پر سر د هغه کورنۍ ته یو لک افغانۍ ورکوي.د بغلان ولایت په څو سیمو کې د سختو سېلابونو د راوتلو له امله تراوسه د ۳۰۰ کسانو د وژل کېدو او د سلګونو نورو د ټپي کېدو خبر ورکړل شوی دی.د راپورونو له مخې؛ ښایي د قربانیانو شمېر تر دې هم زیات شي.
