د طالبانو بهرنیو چارو وزارت وايي، د دې ډلې چارواکو د ملګرو ملتونو له استازو سره د لومړیتوبونو پر شریکولو او د همغږۍ پر زیاتولو خبرې وکړې. په خبرپاڼه کې د امیر خان متقي له قوله ویل شوي، چې نړیوالې مرستې باید د خلکو د اړتیاوو پربنسټ او لومړیتوبونو ته په کتو سره وشي.
طالبان وايي، په دغه ناسته کې پر امیرخان متقي سربېره د دې ډلې د کليو د بيا رغونې او پراختيا، اقتصاد، ماليې، کورنيو چارو، عامې روغتيا، مهاجرينو او راستنيدونکو چارو، کرنې او مالدارۍ او نورو ادارو استازو ګډون درلود.
له مقابل لوري ملګرو ملتونو د بېلابېلو ادارو مسولانو، نړيوالو موسسو او د خصوصي سکتور لوړپوړو استازو ګډون کړی وو.
د افغانستان د خلکو په اړتیاوو او له تېر یوه کال راهیسې د ملګرو ملتونو له خوا پر شويو مرستو خبرې وکړې.
د خبرپاڼې له مخې، یادو مسوولانو د طالبانو پر لومړيتوبونو او د دواړو لورو تر منځ د تفاهم او همغږۍ د پراختيا په اړه هم بحثونه وکړل.
په خبرپاڼه کې د امیر خان متقي له قوله ویل شوي، چې «د څلوېښت کلنو جګړو، ويجاړ اقتصاد، کونډو او یتیمانو، په ګاونډيو هېوادونو کې د ميليونونو کډوالو، پر بهرنيو مرستو ولاړ صحي نظام، پرله پسې وچکاليو، زلزلو، سېلابونو، اقليمي بدلون او د نورو طبيعي ناورينونو لپاره د حکومت اوسني مالي امکانات بس نه دي.»
طالبان په دغه ناسته کې د ملګرو ملتونو د بشري او پرمختيايي برخې د مسوول او د يوناما د مرستيال انډريکا رتواتيذ له قوله وايي دا اداره غواړي د مرستو نوعيت د بشري مرستو تر څنګ پرمختيايي مرستو ته واړوي.
ملګرو ملتونو لاه په دې هکله څه نه دي ویلي، چې له طالبانو سره یې په دغه غونډه کې پر څه خبرې کړې دي.
