رویټرز خبري اژانس د یوه ایراني چارواکي له قوله ویلي: «د ابراهیم رییسي چورلکه په پېښه کې په بشپړه توګه سوځېدلې ده.» د ایران د دولتي رسنیو په وینا، تر اوسه پورې د چورلکې د سپرلیو د ژوندي پاتې کېدو نښې نښانې نه دي ترلاسه شوې.
هاخوا د ایران د سرې میاشتې ټولنې مشر پیرحسین کولیوند منلې چې د دغه هېواد د ولسمشر ابراهیم رییسي د چورلکې د غورځېدو ځای موندل شوی دی.
پیرحسین کولیوند وویل: «حالات ښه نه دي.»
تسنیم خبري اژانس د رییسي د چورلکې د موندل کېدو د شیبې انځورونه خپاره کړي دي.
سپینې ماڼۍ له خبرو مخکې ویلي وو؛ تمه وه چې سلیوان به پر اسراییل فشار راوړي چې پر رفح ښار د پراخ برید پر ځای دې یوازې د حماس وسله وال په نښه کړي.
اسراييل رفح ښار ته د ننوتلو په حال کې دي او وايي، چې دغه ښار د حماس د ځواکونو وروستۍ قرارګاه ده.
په سلګونو زره فلسطینیان له همدې سیمې تښتیدلي دي، چې د دوی د پناه اخیستو له څو محدودو ځایونو و.
د غزې یو اوسیدونکي مجید عمران رویټرز ته ویلي، چې له رفح ښار څخه یې بیا کډې بار کړي او خپلې پخوانۍ سیمې خان یونس ته راغلی، چې پنځه میاشتې وړاندې ترې تیښتې ته مجبور شوي و.
هغه وايي: "په غزې تړانګه کې هېڅ خوندي ځای نه شته."
عمران وايي: "موږ خپل ماشومان، لمسیان او لوڼې واخیستې او د خپل ویجاړ شوي کور پر سر ژوند کوو. ځکه چې دلته د پناه اخیستلو لپاره هېڅ ځای نه شته."
د عمران د ویجاړ کور په یوه څڼډه کې یې د هغه میرمن اور بل کړی و او پخلی یې کاوه.
د غزې اوسیدونکو ویلي، چې اسراییلي ځواکونو د غزې په شمالي برخه کې د جبالیا په تنګو کوڅو کې د شپې او یکشنبې په اوږدو کې پراخ تاوتریخوالی کړی.
په داسې حال کې چې اسراییل وړاندې ویلي وو، چې دا سیمه یې له حماس جنګیالیو پاکه کړې، اوس بیرته دغه سیمې ته راستانه شوي دي.
د اسراییل پوځ ویلي، چې د غزې د کډوالو د اتو تاریخي کمپونو څخه په جبالیا کې یې عملیات روان دي او موخه یې دا ده، چې حماس هلته بېرته ځای ونه نیسي.
د اسراییل پوځ وویل، چې دوی د جبالیا په سیمه کې "د وسله والو ترهګرو د مېشت ځایونو د پېژندلو لپاره عملیات کوي او ... په لسګونو هوايي بریدونه یې ترسره کړي ترڅو د ځمکنیو ځواکونو سره مرسته وکړي".
