د اسلام اباد محکمې د لانګ مارچ قضیه کې عمران خان، شاه محمود او شیخ رشید ته برات ورکړ
په پاکستان کې د اسلام اباد محکمې د تحریک انصاف ګوند مشر عمران خان، د بهرنیو چارو پخواني وزير شاه محمود قريشي او د کورنیو چارو پخواني وزير شيخ رشيد ته د "لانګ مارچ" د ورانکارۍ په قضیه کې برات ورکړ.
د محکمې قاضي شهزاد خان په دغه قضیه کې علي نواز اعوان، فيصل جاويد، قاسم سوري او راجا خرم نواز ته هم برات ورکړ.
د پاکستان د کورنیو چارو پخواني وزیر شيخ رشيد محکمې د حاضریدو پر مهال رسنیو ته وویل، چې پاکستان کې ډېموکراسي له جدي ستونزو کړیږي او حکومت خلکو ته د منلو وړ نه دی.
د عوامي مسلم ليګ ګوند مشر وويل، چې عام خلک باید د هېواد د روان وضعیت په اړه فکر وکړي.
هغه زیاته کړه، چې په هېواد کې روان وضعیت به د ډېموکراسۍ پر وړاندې شته ستونزې لا ډېرې کړي.
د کورنیو چارو پخواني وزیر وویل، چې د پیسو د نړۍوال صندوق له خوا پاکستان ته پور ورکړل شوی دی؛ نو باید د ۱۷مې رتبې مامورینو تنخواګانې دوه چنده شي، کنه د اقتصادي ستونزه له امله به ناورین رامنځته شي.
بل خوا په ننګرهار کې د طالبانو د والي مرستیال مولوي سعید احمد بنوری وايي، چې د تېرو اوولس میاشتو په موده کې ۵۶۲۳۶ کورنۍ د تورخم له لارې له پاکستانه خپل هېواد ته راغلې دي.
نوموړی وايي؛ څه د پاسه ۳۹ کورنۍ په ننګرهار کې مېشتې شوي او له ۱۶ زره زیاتې کورنۍ د هېواد نورو سیمو کې ځای پر ځای شوي دي.
دا په داسې حال کې ده، چې پر پاکستان د ملګرو ملتونو د کډوالو سازمان او د کډوالو ملاتړو ادارو تر فشارونو وروسته هم پاکستان د افغان کډوالو د اېستلو لړۍ دوامداره ساتلي او وايي؛ ټول هغه افغان کډوال له دغه هېواده باسي چې د اوسېدو قانوني اسناد نه لري.
