د لغمان د الیشنګ ولسوالۍ په ماسموت کې د دوو قومونو ترمنځ د جګړې له امله پرون درې کسان وژل شوي او درې ټپیان دي. د طالبانو کورنيو چارو وزارت وايي، «د دواړوو خواوو ۲۵ کسان یې له ۳۰ میله وسلې سره نيولي» خو سرچینې وايي، طالبانو د یوې خوا کسان نیولي، چې درې کسان یې وژل شوي هم دي.
د دې وزارت ویاند عبدالمتین قانع نن پر خپله اېکس پاڼه ليکلي: «د همدې دوو قومونو ترمنځ پخوانۍ دوښمني پاته وه او تېره ورځ يې جګړه وسله والې نښتې ته رسېدلې.»
که څه هم ښاغلي قانع د مرګ ژوبلې کره شمېر نه دی لیکلی، خو وايي، د دواړو خواوو کسان یې نیولي دي.
اما په لغمان کې سرچینې وايي، چې دې نښته کې پرون د یوې خوا درې کسان وژل شوي، خو طالبانو یوازې د مقتول لوري کسان له وسلو سره نیولي دي.
د دې سرچینو په خبره، مقابل لوری چې وژل یې هم کړي، له طالبانو سره د اړیکو له امله نه دی نیول شوی.
سرچینې وايي، د طالبانو له یو طرفه اقدام سره بیا هم دواړه خواوې یو بل ته مورچو کې ناستې دي.
په افغانستان کې د څو څلوېښت کلنې جګړې له امله د خلکو ترمنځ قومي او شخصي دوښمنۍ هم زیاتې پېښې شوې دي.
د طالبانو په واکمنېدو سره دا ډله مختلفو ولایتونو کې هڅه کوي دا ډول بدۍ له منځه یوسي، خو کله کله پر دوی هم د یو لوري د ملاتړ تور پورې کېږي.
