څلورو روسي سرچینو رویټرز ته ویلی، ولسمشر ولادیمیر پوتین چمتو دی چې د خبرو له لارې په اوکراین کې جګړه ودروي خو شرط یې دا دی چې د جګړې اوسنۍ کرښې دې د رسمي سرحد په توګه په رسمیت وپیژندل شي. هغه ویلي، چې که کییف او لویدیځ دغه وړاندیز نه مني، نو هغه چمتو دی چې جګړې ته دوام ورکړي.
د روسیې ولسمشر ته نږدیو دریو سرچینو ویلي، چې پوتین د سلاکارانو یوې کوچنۍ ډلې ته د هغه څه په اړه خپګان څرګند کړی چې نوموړی یې د خبرو د مخنیوي لپاره د لویدیځ هغه هڅې بولي چې له مخې یې د اوکراین د ولسمشر ولادیمیر زیلینسکي پریکړه ردوي.
د روسیې یوې جګپوړې سرچینې چې له پوتین سره کار کوي او په کرملین کې د لوړ پوړو چارواکو له خبرو خبر دی، ویلي: "پوتین کولی شي تر هغه وخته پورې جګړه وکړي، چې اړتیا یې وی، خو پوتین اوربند ته هم چمتو دی - چې جګړه بنده کړي."
د پوتین ویاند دیمیتري پیسکوف په دې اړه وویل، چې د روسیې ولسمشر په وار وار څرګنده کړې چې روسیه خپلو اهدافو ته د رسیدو لپاره خبرو ته چمتو ده او دا چې هیواد یې "ابدي جګړه" نه غواړي.
د اوکراین د بهرنیو چارو او دفاع وزارتونو په دې اړه پوښتنو ته له ځواب ویلو ډډه کړې ده.
د روسیې د دفاع د وزیر په توګه د اقتصاد پوه اندري بیلوسوف ټاکنې، د ځینې لویډیځو پوځي او سیاسي شنونکو له نظره په دې مانا ده چې د یوې اوږدې جګړې د ګټلو لپاره د روسیې اقتصاد ښايي له یو اوږدمهاله ناورین سره مخامخ شي.
