د طالبانو د کډوالو او ستنېدونکو چارو وزارت وایي، د قطر سره مياشت غواړي افغانستان ته د ستنو شویو کډوالو لپاره کورونه جوړ کړي. طالبان د همدې بنسټ د چارواکو په حواله وايي، چې تر مشورو وروسته به د کورنو د جوړېدو شمېر شریک کړي.
د طالبانو د کډوالو او بيرته راستنېدونکو چارو وزارت نن شنبه په يوې اعلامیه کې ويلي، چې دوې ورځي مخکي د دوی وزير خلیل الرحمان حقاني او د قطر د هلال احمر مشر محمد صلاح ابراهيم افغان کډوالو ته پر مرستو رسولو خبرې کړې دي.
اعلاميه زياتوي، محمد صلاح ابراهيم ژمنه کړې، چې د کډوالو په ښارګوټو کې د هغوی لپاره د کورونو د جوړولو چارې به د قطر خیريه صندوق سره تر مشورو ورسته پيل کړي.
پاکستانۍ رسنۍ ډیلي تېره اونۍ راپور ورکړی و، چې د ۲۰۲۴ کال د مې تر ۲۰مې نېټې پورې له پاکستانه د ټولو ستنو شویو افغان کډوالو شمېر ۵۷۷۲۳۹ ته رسېدلی او د ستنېدو دغه لړۍ لاهم روانه ده.
پاکستان او ایران د افغانستان هغه دوه ګاونډي هيوادونه دي، چې په وروستيو دوو کلونو کې يې په لسګونو زره افغانان په جبري ډول له خپلې خاروي ايستلي او هلته يې افغانانو ته د ژوند چارې سختي کړې دي.
بل لوري بيا هغه افغان کډوال، چې وطن ته ستانه شوي هم له بېلابېلو ستونزو څخه شکایت کوي.
د ننګرهار په سور رود ولسوالۍ کې ځايي سرچینو نن افغانستان انټرنشنل ـ پښتو ته وویل، چې طالبانو ددغې ولسوالۍ په جومات کې د لمونځغاړو حاضري اخلي.
د سرچینو په خبره که یو لمونځغاړی د جومات د ملاامام له اجازې پرته غیرحاضري وکړي نو بیا په دغه حاضری کې ثبتیږي.
دوی زیاتوي ملا امامان چې د طالبانو د ډلې غړي دي، د امربالمعروف او نهی المنکر ریاست ته د غیرحاضر کس شکایت کوي او وروسته بیا دغه کس د طالبانو لخوا زندان ته لېږل کیږي.
افغانستان انټرنشنل ـ پښتو د یو کس په اړه د امربالمعروف او نهی عن المنکر د جلب مکتوب ترلاسه کړی دی.
دغه مکتوب د سور رود ولسوالۍ د امر بالمعروف او نهې عن المنکر امریت لیکلی دی.
د امنیتي ستونزو له امله په مکتوب کې د لیکل شوي کس نوم نشو ښودلی خو په جلب مکتوب کې هغه کس ته لیکل شوي، چې د جومات ملا امام د شکایت په اساس تاسې ته خبر درکول کیږي، چې د روان کال د غبرګولي په دریمه نېټه د ننګرهار د سور رود ولسوالۍ امر بالمعروف او نهې عن المنکر د شکایتونو اوریدلو امریت ته حاضر شئ.
سور رود ولسوالۍ کې ځايي سرچینوافغانستان انټرنشنل ـ پښتو ته وویل، چې لومړی غیرحاضر کس پسې جلب راځي، که امر بالمعروف و نهی عن المنکر ته حاضر نشو نو بیا د ولسوالۍ طالبان د دغه کس نیولو اقدام کوي او پر زنداني کېدو سربېره به ۵۰۰ افغانۍ د رنجر د تېلو مصرف ورکوي.
د ننګرهار ځايي اوسیدونکي وايي په ولسوالیو کې ملاامامانو لمونځ کوونکو ته ویلي، چې د غیرحاضري په صورت کې باید له وړاندې دوی ته خبر ور کړي.
د ننګرهار یو ځايي اوسیدونکی وايي اوس د ملا امامانو لپاره دا د فساد سرچینه جوړه شوې، که څوک د لمانځه لپاره جومات ته حاضر نشي؛ نو اړ دي چې د ملاامام له خوا د نه شکایت لپاره هغه ته بډې ورکړي.
طالبانو په لومړۍ دوره کې هغه جوماتونو کې د سوبتیا کتاب یا حاضري درلوده او د لمونځ پر مهال به یې د کلیوالو حاضري اخیسته.
