د جرمني حکومت اعلان کړی، چې له اروپايي ټولنې بهر مسلکي کارګران کولای شي د ځینو معیارونو په پوره کولو سره د جرمني وېزه تر لاسه کړي. د "د فرصت کارت" سکیم له مخې؛ دا کارګران به یو کال وخت ولري، چې جرمني ته له ننوتلو وروسته په دې هېواد کې د ځان لپاره کار ومومي.
د دې پلان له مخې؛ وړ نوماندان په جرمني کې د کارموندنې وړاندیز او تضمین لیک ته اړتیا نه لري.
د پلان له اعلان وروسته د جرمني د کورنیو چارو وزیرې نانسي فایزر وویل؛ د جرمني حکومت هوډ لري، چې د ماهرو کارکونکو لپاره یو فرصت برابر کړي چې د هېواد اقتصاد یې له کلونو راهیسې ورته اړتیا لري.
د جرمني د کورنیو چارو وزیر ویلي، هغه کسان کولای شي چې د «فرصت کارت» پروګرام لپاره درخواست وکړي، چې دوی لږ تر لږه دوه کاله حرفوي زده کړې بشپړې کړي او یا د پوهنتون معتبر سند ولري.
د مهارت لرونکو کارګرانو لپاره د وېزو ورکول د جرمني د حکومت د اصلاحاتو یوه برخه ده، چې موخه یې په دې هېواد کې د ماهرو کارګرانو کمښت راکم کړي.
د جرمني حکومت د رسمي پروسو په ساده کولو سره د ماهرو کارګرانو د جذبولو لپاره دا نوښت اعلان کړ.
برنامې ته غوښتونکي باید د ماهر کارګر په توګه وپېژندل شي یا د پواینټونو پر اساس سیسټم کې لږترلږه شپږ نمرې ترلاسه کړي.
په دې پروګرام کې د پېژندلو وړتوب د ژبې د مهارتونو، مسلکي تجربې، عمر او جرمني سره د غوښتونکي د اړیکو پر بنسټ د سکور کولو سکیم پر بنسټ ټاکل کیږي.
همدارنګه ویل شوي، چې هغه کسان چې د فرصت کارت ترلاسه کولو وړ وي حق لري، چې د یو کال لپاره په جرمني کې د خپل مسلک اړوند کار وپلټي او په دې موده کې کولی شي په اونۍ کې شل ساعته په نورو برخو کې کار وکړي.
