د یمن حوثيان وايي، په سور سمندرګي او عربي بحیره کې پر درېیو بېړیو بریدونه کړي دي
په یمن کې د ایران پورې تړلې حوثي ډلې ویلي، چې په سور سمندرګي او عربي بحیره کې یې پر درېیو بېړیو بریدونه کړي دي.
په یمن کې د ایران پورې تړلې حوثي ډلې ویلي، چې په سور سمندرګي او عربي بحیره کې یې پر درېیو بېړیو بریدونه کړي دي.
بل خوا د میارسکب نومي شرکت هغه راپورونه رد کړي، چې ګواکې د دوی پر بېړۍ د حوثي ډلې له خوا برید شوی.
حوثي یاغیان چې د یمن په ډېرو سیمو کنټرول لري، له میاشتو راهیسې په سیمه کې په بېړیو بریدونه کوي او په وار - وار یې ویلي، چې دا کار په غزه کې د اسراییل د جګړې پر وړاندې له فلسطینیانو سره د پیوستون ښودلو په موخه کوي.
د حوثیانو د پوځ ویاند یحیی سري د چهارشنبه په ورځ په یوه ټلویزیوني وینا کې وویل، چې حوثیانو په سور سمندرګي کې د روزا او وانتج ډریم په نوم پر دوه کښتیو د توغنديو او ډرون پر مټ برید کړی. هغه ونه ویل چې دا بریدونه کله شوي دي.
ښاغلي سري ویلي، چې حوثیانو په عربي بحیره کې د متحده ایالاتو د مارسک سلیټار نومې بېړۍ پر وړاندې هم د ډرون برید کړی خو نور جزییات نه دي ورکړي.
د مارسک د رسنیو اړیکو مدیر کیون ډویل د پنجشنبې په ورځ وویل، چې د مارسک سلیټار له خوا د داسې کومې پیښې راپور نه دی ترلاسه شوی.
