روسیه: له طالبانو سره د نشه‌يي توکو، ترهګرۍ او له جرمونو سره د مبارزې لپاره په اړیکه کې یو

د پاکستان جیونیوز رسنۍ د راپور له مخې په پاکستان کې ۵۳ زره بهرنیانو ته شکمن شناختي کارډونه ورکړل شوي دي.

یادې رسنۍ د خیبرپښتونخوا ایالت د کورنیو چارو د وزیر له قوله لیکلي؛ چې په خیبر پښتونخوا کې د «ناقانونه» کډوالو په نوم ۵۹۵ شناختي کارډونه ثبت شوي او د ۷۵۰۰ جعلي شناختي کارډونو پر ضد یې قضیې ثبت کړي.

د راپور له مخې د خیبرپښتونخوا دغه چارواکي ویلي، چې د یادو کسانو سیمکارټونه بند شوي او د ملکیتونو او سوداګرۍ په وړاندې به یې قانوني چلند وشي.

په راپور کې ویل شوي چې د بهرنیانو په نوم ۳۴۹بې نومه ملکیتونه او کاروبارونه هم پيژندل شوي او د څیړنې لپاره یې قضیه د خیبرپښتونخوا د عوایدو فډرالي بورډ ته سپارل شوې ده.

د خیبرپښتونخوا ایالت د کورنیو چارو وزارت ویلي، چې د بهرنيو «ناقانونه» تاجک وګړو د ایستلو پریکړه یې هم کړې، او په مدرسو کې د افغان طالبانو په اړه به هم له سره کتنه کوي.

د دې تر څنګ د خیبرپښتونخوا او بلوچستان ایالتونو د کورنیو چارو وزارتونو په یادو دوو ایالتونو کې د افغانانو په نوم ۲۳۴۳ شکمنو بانکي حسابونو پلټنه هم بشپړه کړې ده.

د راپورونو له مخې د پاکستان حکومت له یاد هېواد څخه د «ناقانونه» کډوالو د ایستلو د دویم پړاو د ګړندي کولو په اړه له اړوندو ادارو سره هم ناستې کړې دي چې دا بهیر چټک کړي.

د بشري حقونو د مدافعانو ډله وايي، ځینې حکومتونه هڅه کوي، چې د بشري حقونو تر ټولو خطرناکو څېرو او جنګي مجرمانو ته معافیت ورکړي.

د بشري حقونو دغې ډلې د طالبانو د سفر له امله پر روسیې، متحده عربي اماراتو او سعودي عربستان نیوکه کړې ده.

د ملګرو ملتونو د امنیت شورا د بندیزونو کمېټې د پنج شنبې په ورځ سراج الدین حقاني او یو شمېر نورو طالب چارواکو ته د حج سفر لپاره له بندیزونو معافیت ورکړی.

پر حقاني سربېره د ملګرو ملتونو د امنیت شورا د بندیزونو کمېټې مولوي عبدالکبیر، عبدالحق وثیق او نور محمد ثاقب هم د حج سفر لپاره معاف کړي.

د طالبانو د پوهنې او لوړو زده کړو وزیران حبیب الله اغا او ندا محمد ندیم هم اوس په روسیه کې دي.

د بشري حقونو د مدافعانو ډلې د طالب چارواکو د سفر په اعتراض کې ویلي؛ چې طالبانو افغان نجونې او ماشومان له زرو ورځو راهیسې له خپلو بنسټیزو حقونو او زده کړو له حقه بې برخې کړي دي.

د بشري حقونو د مدافعانو دغې ډلې د ملګرو ملتونو د امنیت شورا د بندیزونو د څارنې له کمېټې وغوښتل چې په دې اړه جدي ګامونه پورته وکړي.

د بشري حقونو دغې ډلې په افغانستان کې له بنسټونو او د بشري حقونو له خبريالانو غوښتي چې د "بشري حقونو او جنګي مجرمانو" د معافيت په اړه خپل دريځ روښانه کړي او د نړۍ له حکومتونو څخه وغواړي چې په افغانستان کې د بشري حقونو نړيوال منل شوي د کنوانسیونونو سره سم د منځپانګو د ورته والي معيارونه عملي کړي.

د بشري حقونو د مدافعانو ټولنې په یوه بلنه کې له رسنیو او د افغانستان له مدني ټولنو څخه هم غوښتل شوي چې د جنګي جرمونو او د بشري حقونو پر ضد د معافیت په بندولو کې ورسره همغږي شي.

د طالبانو د کډوالو او رستنېدونکو چارو وزارت د دوشنبې په ورځ د (غبرګولي ۲۱مه) په خپله اېکس پاڼه لیکلي، چې تېره ورځ د هرات ولایت د اسلام کلا له لارې ۲۷۷۴ تنه افغان له ایران څخه په زور او خپله خوښه راستانه شول.

د کډوالو وزارت وايي، له ایران څخه په تازه راستنو شویو کډوالو کې ۲۶ تنه یې بې سرپرسته ماشومان وو چې د کورنیو موندلو په مخه یې په دغه ولایت کې وارچایلډ موسسې ته سپارلي دي.

یاد وزارت زیاتوي چې له ایران څخه د راستنو شويو کډوالو له جملې۶۴ اړمنو کورنیو سره د یاد وزارت له لوري د مرستو ترڅنګ یو شمېر نورو کډوالو ته روغتیايي خدمتونه وړاندې شوي دي.

همدارنګه د کډوالو وزارت وايي، د غبرګولي په ۲۰ نېته ۹۱۱ تنه افغان کډوال د تورخم او سپین بولدک له لارو د پاکستان حکومت له لوري په زور راستانه کړل شول.

دغه وزارت وايي، ۱۲۵ کورنۍ چې د غړو شمېر یې ۷۱۱ تنو ته رسیږي د تورخم او ۳۸ کورنۍ چې د غړو شمېر یې ۲۰۰ تنو ته رسیږي د سپین بولدک له لارې راستنې شوې دي.

طالبان وايي د پاکستان له لوري په زور راستانه شوي ټول کډوال یې د ملګرو ملتونو عالي کمېشنرۍ، د کډوالۍ او خوړو نړېوال سازمان دفترونو ته د مرستو ترلاسه کولو په موخه ورپيژندلي دي.

افغانستان ته په داسې حال هره ورځ سلګونه افغان کډوال له ګاونډیو هېوادونو په زور ستنیږي چې په دغه هیواد کې واک ته د طالبانو له رسېدو وروسته زرګونو افغانانو د اوزګارتیا له امله پر ناقانونه لارو اروپايي هېوادونو ته تګ پیل کړی.

د طالبانو تر واک لاندې ملي ټلویزیون په ایکس پاڼه د دغې ډلې عدلیې وزارت له قوله لیکلي چې، د افغانستان په شمال کې د وروستیو سېلابونو له امله په زیامنو شویو دوو ولایتونو بغلان او تخار کې خیریه بنسټونو له سېلاب ځپلو کورنیو سره څه باندې ۵۶ میلیونه افغانۍ مرستې کړې.

پر طالبانو تور دی چې د نړېوالو مرستو تر واک لاندې ساتلو لپاره یې سلګونه خیریه بنسټونه جوړ کړي او د دوی د کورنیو غړي او یا یې خپلوان مشري او مدیریت کوي.

واک ته د طالبانو تر رسیدو وروسته نړېوالې ټولنې طالبانو ته وویل چې بشري مرستې به د دوی له لارې نه بلکې د خیریه بنسټونو له لارې ورکوي. چې له هغه وروسته طالب مشرانو د نورو په نومونو خیریه بنسټونه ورته جوړ کړل.

د افغانستان په شمالي ولایتونو کې د تېرې غوايي میاشتې په وروستیو کې د زورورو سېلابونو له امله په سلګونو خلک مړه، سلګونه کورنه ویجاړ او په زرګونو جرېبه کرنیزې ځمکې اوبو ویجاړې کړې.

د جرمني په مانهایم ښار کې د یوه افغان کډوال له برید وروسته چې یو پولیس یې وواژه او پنځه نور یې ټپیان کړل، د جرمني لومړي وزیر وویل چې خطرناک جنایت کوونکي او ترهګر په جرمني کې ځای نه لري.

د جرمني بهرنیو چارو پخواني وزیر ویلي: «له طالبانو سره باید خبرې وشي، چې افغانستان ته د مجرمانو ایستل لازمي شي.» دغه پخواني جرمني چارواکي ویلي چې هیوادونه باید د ایستل شویو پناه غوښتونکو د منلو په بدل کې اقتصادي مرستې وکړي.

تر دې مخکې د طالبانو د بهرنیو چارو وزارت له جرمني سره د افغان کډوالو د ایستلو په اړه خبرو ته چمتووالی ښودلی و. د طالبانو بهرنیو چارو وزارت په یوه خبرپاڼه کې ویلي چې کډوال باید د سیمې هېوادونو ته ونه ایستل شي.

په افغانستان کې د طالبانو د واکمنۍ او له کابل سره د ډیپلوماتیکو اړیکو نشتوالي ته په پام سره ځینو جرمني سیاستوالو غوښتل چې د پاکستان په ګډون د سیمې له هېوادونو سره د افغان کډوالو د ایستلو په اړه خبرې وکړي.

د جرمني بهرنیو چارو پخواني وزیر وویل: «د یهودو ضد نیونازیانو او د ازادۍ او ډیموکراسۍ ضد اسلامپالو تر منځ یوه ټلواله رامنځته شوې چې باید مقابله ورسره وشي.»

هغه وویل چې د جرمني لومړی وزیر یو ښه چانس لري چې شته ممنوعیت مات کړي او له جرمني څخه د خطرناکو مجرمانو د ایستلو لپاره قانوني لاره برابره کړي.

د بشردوستانه قوانینو او ملحوظاتو له مخې، د جرمني حکومت نه شي کولای رد شوي پناه غوښتونکي او هغه کسان چې په جرمونو تورن وي، وباسي. خو ښي اړخي ګوندونه وايي چې دغه پناه غوښتونکي باید په هر ډول چې وي له هېواده وایستل شي.

اوس مهال له جرمني څخه د افغان کډوالو ایستل په دې دلیل درول شوي چې په افغانستان کې طالبان واکمن دي،ان هغه کسان چې جرم یې هم کړی وي.

په جرمني کې ځینو سیاسي بهیرونو اندېښنه ښودلې چې له طالبانو سره هر ډول خبرې اترې به دغې ډلې ته د مشروعیت په معنا وي.