د روسیې د بهرنیو چارو وزارت ویانده وايي، چې هېواد یې له طالبانو سره د نشه یي توکو له قاچاق، ترهګرۍ او سازمان شویو جرمونو سره د مبارزې لپاره په اړیکه کې دی. ماریا زاخارووا وویل، دا زمو په ګټه ده چې بدلونونو ته د خپلو ملي ګټو سره سم ځواب ووایو.
ماریا زاخارووا د سنټ پیټرزبورګ د اقتصادي غونډې په څنډه کې ټاس خبري اژانس ته وویل: «په دې غونډه کې د «طالبانو تحریک» پلاوي شتون ناببره نه دی، د ګټورو سوداګریزو اړیکو د پیاوړتیا امکانات موجود دي.»
مېرمن زاخارووا وویل: «سترې سیمه ییزې پروژې شته دي چې افغانستان پکې ونډه لري.»
هغې د روسیې د ترهګریز سازمانونو له نوملړ څخه د طالبانو د ایستلو د موضوع د بڼې د څېړلو او څرنګوالي په اړه هم ځواب ورکړ او ویې ویل؛ «د بېلابېلو برخو کارپوهان په دې اړه کار کوي.»
د سنټ پيټرزبورګ ٢٧ مه اقتصادي غونډه د جون له پنځمې تر اتمې پورې جوړه شوې وه او د طالبانو د کار او ټولنيزو چارو وزير عبدالمنان عمري په کې ګډون کړى و.
د روسیې ولسمشر ولادیمیر پوتین د سې شنبې په ورځ (غبرګولي اتمه) له طالبانو سره د اړیکو ټینګول یوه اړتیا وګڼله.
پوتین وویل چې طالبان پر افغانستان واک لري.
ښاغلي پوتین د ازبکستان په پلازمېنه تاشکند کې له خبریالانو سره په خبرو کې وویل: «موږ به د خپل هر شریک او ملګري نظرونه په پام کې ونیسو او په دې مسله کې به همغږي ولرو.»
