په کابل کې د اسلامي هېوادونو ډېپلوماټانو هم له طالبانو سره يو ځای د اختر لمونځ وکړ
د طالبانو د ریاست الوزرا د اداري مرستیال دفتر په يوې خبرپاڼه کې ويلي، چې د يو شمېر اسلامي هېوادونو ډېپلوماټانو له طالب مشرانو سره يو ځای په سپېدار ماڼۍ کې د اختر لمونځ ادا کړ.
طالبانو د سعودي عربستان او یو شمېر نورو اسلامي هېوادونو څخه جلا یوه ورځ وروسته اختر ونمانځه.
د لوی اختر د لمانځه په دې مراسمو کې د ریاست الوزرا سیاسي مرستیال عبدالسلام حنفي او د طالبانو د بهرنیو چارو وزير امير خان متقي تر څنګ د یو شمېر بهرنیو اسلامي هېوادونو ډېپلوماټانو ګډون درلود.
د ریاست الوزرا د اداري مرستیال دفتر نن دوشنبې په يوې اعلاميه کې ویلي، چې عبدالسلام حنفي د اختر د لمانځه د ادا کولو پر مهال د «غزې مسلمانانو ته د اختر مبارکي ويلې.»
په اعلاميه کې راغلي، چې حنفي له خپلو طالب مسوولينو غوښتي، چې د خلکو هوساينې ته په پام خپل مسوليتونه ادا کړي.
د طالبانو مشر ملا هبت الله هم په کندهار کې د اختر لمانځه ادا کولو پر مهال د طالبانو د حکومت مشرانو ته په اشارې سره وویل: «له خپلمنځي مخالفتونو تېر شئ او که داسې ونه کړئ دښمن به مو نظام در ویجاړ کړي.»
نوموړي د طالبانو د حکومت پر یووالي ټينګار وکړ.