د طالبانو د سوداګرۍ او صنعت وزارت وایي، چې افغانستان په تېرو ۵ میاشتو کې د ۷ میلیون او ۵۰۰ زره ډالرو په ارزښت غالۍ بهر ته صادر کړې دي. د دغه وزارت ویاند رسنیو ته ویلي، چې د افغانستان غالۍ په دې موده کې ډېری پاکستان او اروپایي هېوادونو ته صادرې شوې دي.
عبدالسلام جواد ویلي، چې د ۲۰۲۴ کال په لومړیو پنځو میاشتو کې څه باندې دوه میلیونه کیلو ګرامه غالۍ له افغانستان صادر ې شوې دي.
د نوموړي په خبره، دا اندازه غالۍ د امریکا او المان په ګډون اسیایي هېوادونو هند، پاکستان، چین ازبکستان، ترکیې او یو شمېر نورو هېوادونو ته صادرې شوې دي.
څه موده مخکې په افغانستان کې د ترکیې سفارت ویلي و، چې په افغانستان کې ۱،۲ میلیونه کسان د غالیو په تولید بوخت دي.
د راپورونو له مخې، په ۲۰۲۳ کال کې ۱،۲ میلیونه مترمربع غالۍ تولید شوې دي او د غالیو ۹۵ سلنه محصولات بهر ته صادر شوي دي.
په افغانستان کې له کرنې وروسته د غالیو د تولید په سکټور کې تر ټولو زیات کاري فرصتونه برابر دي او د هېواد په بېلابېلو برخو کې زرګونه مېرمنې د غالیو په اوبدلو بوختې دي.
د غالیو کاروبار له لسیزو راهيسې د افغانانو لپاره تر ټولو ښه عاید لرونکی کسب دی.
که څه هم د افغانستان غالۍ د نړۍ په بېلابېلو هېوادونو کې ډېر خوښوونکي لري؛ خو د دغه صنعت کاروباریان بیا د صادراتو په برخه کې له جدي ننګونو سر ټکوي او وایي، د افغانستان غالۍ د پاکستان په نوم بهرنيو هېوادونو ته صادرېږي.
