د طالبانو د کانونو او پټرولیم وزارت ویاند وایي، په تېرو درېو کلونو کې یې کورنیو شرکتونو ته د لس میلیارده افغانیو په ارزښت د کوچنیو معدنونو د کیندنې قراردادونه ورکړي. همایون افغان وایي، دا قراردادونه په بېلابېلو برخو کې له افغان پانګوالو سره شوي دي.
همایون افغان د طالبانو تر واک لاندې ملي ټلویزیون سره په خبرو کې ویلي، چې یاد وزارت د کوچنیو کانونو ترڅنګ د ۳۰ لویو کانونو د کېندنې لپاره هم له یو شمېر کورنیو او بهرنیو شرکتونو سره قراردادونه لاسلیک کړي دي.
د نوموړي په خبره، ددغو لویو قراردادونو ارزښت اوه تر اته میلیارده ډالرو پورې رسېږي.
د همایون افغان زیاته کړې ده، چې د څوارلسو لویو کانونو قراردادونه چې د سرو زرو، یاقوتو، سرب او جست، د سکرو د ډبرو، سمنټو او بېلابېلو نورو برخو کې دي، په ۱۴۰۲ کال کې شوي دي.
دغه کانونه د کابل په ګډون په هرات، غور، بغلان، تخار او یو شمېر نورو ولایتونو کې موقعیت دي.
که څه هم ځیني اقتصاد پوهان بیا په دې باور دي چې د هیواد د کانونو قانوني استخراج افغانستان خودکفایي ته رسوي، خو ځیني نور بیا وایي چې طالبان دغه کانونه په مسلکي توګه نه استخراج کوي.
د راپورونو له مخې، افغانستان د نړۍ له هغو هېوادونو څخه دی چې شاوخوا د درې تریلیون ډالرو په ارزښت معدني ذخایر لري.
