فلسطیني عیني شاهدانو ویلي، چې د یکشنبې په ورځ رفح ښار ته څېرمه پر یو روزنیز مرکز، چې د مرستو د وېش لپاره ترې کار اخیستل کېده، د اسراییل په هوايي برید کې اته فلسطینیان وژل شوي دي. دا پیښه په داسې مهال شوې، چې د اسراییل ټانکونه رفح ښار ته د ننوتلو په حال کې وو.
عیني شاهدانو وویل، چې برید د یو روزنیز مرکز ځینې برخې په نښه کړي، چې د فلسطیني کډوالو لپاره د ملګرو ملتونو ادارې له خوا د مرستو د وېش لپاره کارول کېده.
یو عیني شاهد محمد تفیش وویل: "ځینې خلک د کوپون اخیستو لپاره راغلي وو او نور له خپلو کورونو بې ځایه شوي وو او دلته یې پناه اخیستې وه، ځینو یې له بمبې اوبه ډکولې، نورو یې کوپونونه اخیستي وو، چې ناڅاپه مو د یو څه د غورځېدو غږ واورېده او چاودنه وشوه.”
د رویټرز خبري اژانس عکاس یوه ودانۍ لیدلې چې په بشپړ ډول ړنګه شوې او جسدونه یې د سړک تر څنګ په کمپلو کې پوښل شوي لیدلي دي.
تفیش وویل: «مونږ شهیدان د نړېدلې ودانۍ څخه را ایستل، په دوی کې یو هغه کس و، چې دلته یې دوکان درلود او نور هغه کسان وو، چې کوپون یې اخیستی و او بېرته د خپلو سیمو په لور تلل. شاوخوا څلور یا پنځه شهیدان او لس ټپیان دي. د خدای شکر دی چې د ټپیانو حالت ښه دی."
د اسراییل پوځ د پیښې په اړه له څه ویلو ډډه کړې ده.
د فلسطیني کډوالو لپاره د ملګرو ملتونو ادارې د عامه اړیکو مشر جولیټ توما وویل، چې دغه اداره د نورو معلوماتو له وړاندې کولو د مخه د دغه برید په اړه د لا ډېرو جزییاتو په راټولو بوخته ده.
هغه وویل: "د جګړې له پیل راهیسې، زمونږ شاوخوا ۱۹۰ ودانۍ په نښه شوي دي. دا په غزه کې زموږ د ودانیو لویه برخه ده."
نوموړي وویل، چې په دغه جګړه کې د یادې ادارې ۱۹۳ کارکوونکي وژل شوي دي.
