ازادۍ جبهه وايي، کابل کې یې پنځه طالبان وژلي
د افغانستان ازادۍ جبهې د دوشنبې په ورځ ویلي، چې د کابل ښار په علاوالدین څلور لارې کې د طالبانو په یو سیار چک پاینټ برید کې پنځه طالبان وژلي دي.
د افغانستان ازادۍ جبهې د دوشنبې په ورځ ویلي، چې د کابل ښار په علاوالدین څلور لارې کې د طالبانو په یو سیار چک پاینټ برید کې پنځه طالبان وژلي دي.
دغه جبهې په يوه خبرپاڼه کې ليکلي، چې په دې بريد کې د طالبانو دوه غړي ټپيان شوي هم دي.
طالب چارواکو تر اوسه په دې اړه څه نه دي ویلي.
د ازادۍ جبهې له دې برید څخه یوه ویډیو هم خپره کړې چې په کې د چاودنې غږ اوریدل کیږي.
د طالبانو کورنيو چارو وزارت ویاند د يوې اعلامیې په خپرولو سره له نړۍوالو سازمانونو څخه غوښتي، چې د افغان بزګرانو سره د کوکنارو د بديل معيشت په برخه کې همکاري وکړي.
عبدالمتين قانع وايي، چې د افغانستان له اړخه نړۍ او ګاونډيو هېوادونو ته د نشه يي توکو په برخه کې هېڅ ګواښ موجود نه دی.
د طالبانو د کورنيو چارو وزارت ویاند عبدالمتين قانع د دوشنبې په ورځ په يوې خبرپاڼه کې ويلي، چې نشه يي توکي یو نړۍوال ګواښ دی او له دې پدېدې سره مبارزه د هېوادونو او نړۍوالو سازمانونو ګډو هڅو ته اړتيا لري.
قانع وايي، چې واک ته د دوی د رسېدو سره سم يې د نشه يي توکو کښتونه له منځه وړي.
نوموړي هيله ښودلې، چې نړۍ او سازمانونه دې افغان بزګرانو ته د کوکنارو د بدیل معشیت په برخه کې همکاري وکړي.
که څه هم طالبان په افغانستان کې د کوکنارو د کښتونو د له منځه وړلو یادونه کوي؛ خو لا هم د افغانستان په سويلي او شمالي ولایتونو کې په پراخه کچه د نشه يي توکو د کښتونو شتون لري.
پرون یکشنه (د چنګانښ ۳مه) د هلمند يو شمېر کروندګرو افغانستان انټرنشنل - پښتو ته وويل، چې دوی د کوکنارو د کر یو بل فصل ته تیاری نیسي او کروندې ورته اماده کوي.
دغو کروندګرو او تارياک پلورونکو، چې د پلور لوی بازارونه بند شوي وايي اوس کاروبار له کورنو څخه مخ ته وړي.
پر طالبانو نیوکې دا دي، چې دغه ډله په ځینې جنوبي ولایتونو کې د کوکنار کښت اړولو کې توپیري چلند کوي.
د زرغون بهیر مشر د رزا اوتنبایوا د وروستیو څرګندونو په غبرګون ویلي، چې طالب مشرانو کله هم غرونه نه دي لیدلي او هغوی شل کاله په پاکستان او دوحه کې تېر کړي دي.
امرالله صالح په خپل اېکس کې اوتنبایوا ته لیکلي، چې د افغانستان په اړه لویې پرېکړې طالب مشران کوي که هغه ملېشې چې له غرونو ښکته شوي او په چک پواینټونو ولاړ دي؟
نوموړی همداراز زیاتوي، چې د طالبانو مشرتابه څه باندې شل کاله په کراچۍ، پېښور، راولپنډي، اسلام اباد، کوېټه او دوحه کې وخت تېر کړی دی.
ښاغلی صالح زیاتوي، چې که د یادو ښارونو نقشې ته وکتل شي هېڅ یو یې غرنی نه دی او غرونه نه لري او په عین حال کې د طالبانو د پرېکړې اصلي مرکز کندهار ښار دی.
نوموړی وایي: «ځیني طالب چارواکي د دوحې له ننګینې هوکړې وروسته په امریکایي الوتکو کې کندهار او کابل ته راوستل شول.»
د زرغون بهیر مشر همداراز له مېرمن اوتنبایوا څخه پوښتنه کوي، چې د کندهار تر ټولو لوړ غرونه چهل زینه او فیل کوه دي، چې د دواړو لوړوالی تر سلو مترو نه رسېږي: «نو هغه غرونه چې طالبان ترې راښکته شوي او تاسو ورته اشاره کړې ده، په کوم ځای کې موقعیت لري؟»
د افغانستان لپاره د ملګرو ملتونو ځانګړې استازې د دوحې په ناسته کې د ښځو له ګډون سره د طالبانو د مخالفت په اړه ویلي، چې طالبان په غرونو کې جنګېدلي او له هماغو غرونو ښکته شوي دي؛ نو داسې تمه ترې باید و نه شي، چې د نورو په شان دې فکر او سوچ ولري.
ښاغلي صالح د رزا اوتنبایوا د دې خبرو په غبرګون چې وایي؛ باید په تمه شو څو طالبان مدني شي.
نوموړي د اوتنبایوا دا څرګندونې د سوېس د الپ او قرغېزستان په ګډون د ټولو درو او غرنیزو سیمو اوسېدونکو ته مخامخ سپکاوی بولي.
د زرغون بهیر مشر له رزا اوتنبایوا څخه غواړي، چې د افغانستان له خلکو بخښنه وغواړي که نه نو د هغې نوم به طالب اوا کېښودل شي.
نوموړي له اوتنبایوا څخه دغه راز غوښتي: «د اوتنبایوا او طالب اوا څخه یو وټاکه.»
د یوناما مشرې د جمعې په ورځ د چنګاښ په لومړۍ نېټه د افغانستان په اړه د ملګرو ملتونو د امنیت شورا د غونډې په څنډو کې د خبریالانو پوښتنې ځوابولې.
نوموړې د افغانستان انټرنشنل د خبریالې مریم رحمتي د دې پوښتنې په ځواب کې چې د دوحې په ناسته کې د مېرمنو د برخې اخېستنې په اړه د طالبانو شرطونه څه دي وویل، چې دغې ډلې لا له وړاندې د مېرمنو د ګډون سره مخالفت ښودلی و.
رزا اوتنبایوا وویل، چې طالبان «زموږ او تاسې په شان نه دي. طالبان له غرونو او جګړو راغلي دومره اسانه هم نه ده، چې د یو مېز تر شا خبرو اترو ته کېني او زموږ اصولو ته غاړه کېږدي.»
د تحریک انصاف ګوند او د پاکستان د پارلمان غړی اسد قیصر د اپوزسیون په نماینده ګۍ وايي، چې دوی د پوځ له خوا د تازه عملیاتو مخالف دي او دوی به هېچا ته اجازه ور نه کړي، چې په پښتونخوا کې بیا جنګ پیل کړي. هغه وايي، چې د عملیات له افغانستان سره د جنګ په معنا دي.
نوموړي د دوشنبې په ورځ د پاکستان په پارلمان کې حکومت او د پاکستان پوځ ته په اشارې سره وویل: "تاسو چې کومه طریقه خپله کړې او له افغانستان سره د دښمنۍ یو بل دور شروع کوئ، موږ ته قبوله نه ده".
د اسد قیصر په خبره؛ که چېرې هر څوک د دوی په سیمه کې بیا جګړه پیلوي دوی به د خپل ملت تر شا دریږي او په شریکه به یې مخالفت کوي.
هغه وویل: "که د هر چا دا فکر وي په خدای قسم چې اول به زموږ په جسدونو تېریږي او بیا به جګړه پیلوي، موږ څه بنګړي نه دي په لاس کړي".
نوموړي پر ملا فضل الرحمان او محمود خان اڅکزي غږ کړی، چې کولي شي له افغانستان سره رامنځته شوې ستونزه په اسانۍ او خبرو حل کړي.
د پاکستان پوځ تازه د عزم په نوم د خپلو مخالفو ډلو د ځپلو لپاره عملیات پیل کړي، چې له مخې یې په سرحدي سیمو کې خپل مخالفین ځپي.
دغه چاره د تحریک انصاف ګوند سربېره د پاکستان د ګڼو سیاسي ګوندونو او اشخاصو له منفي غبرګون سره مخ شوې ده.
د طالبانو د کورنیو چارو وزارت ویاند وايي، چې د دوی د تخنیکي چارو ادارې د خلکو د شخصي موبایلونو د خونديتوب لپاره پرمختللی الکټرونيکي سیستم جوړ کړی. عبدالمتین قانع زياتوي، چې هڅه کوي دا سيسټم د افغانستان په بېلابېلو برخو کې عملي کړي.
د طالبانو کورنيو چارو وزارت ویاند عبدالمتين قانع د دوشنبې په ورځ په يوې خبرپاڼه کې ويلي، چې دوی د تېر یوه کال په جريان کې د خلکو د شخصي موبایلونو د خونديتوب سیسټم له لارې ۷۰۴ غلا شوي موبایلونه پېدا کړي او اصلي خاوندانو ته یې سپارلي دي.
طالبانو څه موده مخکې په دې سیسټم کې خلکو ته د ټلیفونونو د ثبت فورمې هم وېشلي او له خلکو یې غوښتي، چې خپل موبایلونه راجسټر کړي.
وړاندې تر دې طالبانو ويلي وو، چې دوی غواړي په ټول افغانستان کې د مخابراتي شبکو سيم کارټونه هم راجسټر کړي؛ تر څو له دې لارې د تاوتريخوالي او پېښو د رامنځته کېدو مخه ونيسي.
د طالبانو تر کنټرول لاندې باختر اژانس خبر ورکړ، چې په زابل کې طالبانو د ترکيې هېواد د يوه خيريه بنسټ په مالي مرسته د خپل پخواني مشر «ملا محمد عمر» مقبرې ته د سړکونو درغولو چارې پيل کړې.
د طالبانو د زابل والي حزب الله افغان رسنيو ته وویل، چې دغه سړکونه ۵۰۰ متره دي، چې د يوې میاشتي په موده کې به ورغول شي.
د دغو سړکونو د جوړولو چارې د حبیب افغان په نوم يوه افغاني شرکت ته ورکول شوي دي.
طالبانو د دغه سړکونو د جوړېدو د مالي لګښت په اړه معلومات ور نه کړل.
د طالبانو والي د دغه سړکونو د جوړېدو له شرکت څخه غوښتي، چې چاري په «مخلصانه ډول» ژر سرته ورسوي.
د طالبانو د پخواني مشر «ملا محمد عمر» مقبره د زابل سيوري ولسوالۍ د عمرزو کلي ته څېرمه په يوه دښته کې ده.
څه موده مخکې طالبانو دغې مقبرې ته څېرمه د يوې لوي ديني مدرسې د جوړولو چارې هم پيل کړي وې، چې تر اوسه دوام لري او ځايي طالبان یې د ژر جوړېدو خبره کوي.
ځايي طالب چارواکي وايي، چې د دغې مدرسې ودانۍ به په یو وخت د سلګونو طالبانو د ځایولو وړتیا ولري.
دغه مقبرې ته هره ورځ په زيات شمېر خلک د ليدو لپاره ورځي.