سیما سمر: نړیوالې ټولنې تر ډیره افغانان له خبرو او پرېکړو څڼډې ته کړي دي
د افغانستان د بشري حقونو د کمیسیون پخوانۍ مشرې د دوحې دریمه غونډه ناکامه وبلله او ویې ویل چې د خلکو او په ځانګړې توګه د ښځو له حضور پرته هره پریکړه د منلو وړ نه ده.
د افغانستان د بشري حقونو د کمیسیون پخوانۍ مشرې د دوحې دریمه غونډه ناکامه وبلله او ویې ویل چې د خلکو او په ځانګړې توګه د ښځو له حضور پرته هره پریکړه د منلو وړ نه ده.
سیما سمر افغانستان انټرنشنل ته وویل، چې نړیوالې ټولنې تر ډیره افغانان په خبرو اترو او پریکړو کې نه دي دخیل کړي.
سیما سمر ټینګار کړی چې د طالبانو غوښتنو ته تسلیمېدل په افغانستان کې د بشري حقونو د لا زیاتو سرغړونو بنسټ جوړوي.
هغې وویل، چې طالبان د افغانستان د خلکو استازیتوب نه کوي او دا ډله ولسي ملاتړ نه لري.
مېرمن سمر زیاته کړه چې نړیوالې ټولنې د ښځو او بشري حقونو په مسلو کې له طالبانو سره همغږي کړې ده.
هغې څرګنده کړه:«د دوحې په غونډه کې هره موضوع چې بحث پرې وشو، د افغان ښځو پر وضعیت مستقیم اغېز لري. په دې غونډه کې د ښځو نه شتون ښيي چې دوی د ستونزو د حل په لټه کې نه دي، بلکې د وخت تېرولو په لټه کې دي.»
د بشري حقونو د کمېسیون پخوانۍ مشرې وویل، چې د ملګرو ملتونو بنسټیزه دنده د بشري حقونو ساتنه ده، خو د هغې په وینا، دغې ادارې د دوحې په غونډه کې د بشري حقونو موضوع له پامه غورځولې.
