د طالبانو دفاع وزیر د پاکستان دفاع وزیر د وروستیو څرګندونو په غبرګون کې ویلي، چې که هر څوک په هره بهانه زموږ پر حریم تیری وکړي د عواقبو مسئولیت به یې په خپله غاړه وي. د پاکستان د دفاع وزیر ویلي و، چې دغه هیواد به په افغانستان کې دننه د ټيټيپي پر ضد عملیات کوي.
د طالبانو دفاع وزارت نن جعمې - د جنګاښ ۸مه - پر اېکس ټولنزي شبکې یو پیغام کې لیکلي چې د افغانستان د ملي حاکميت د نقض د احتمال په تړاو د پاکستان د دفاع وزیر وروستۍ څرګندونې یو ناسنجیده عمل او د اوبو خړولو هڅه ده چې د هېچا په ګټه به نه وي.
د طالبانو دفاع وزارت زیاتوي چې د پاکستان رهبرۍ ته په کار ده، هېچا ته اجازه ور نه کړي چې په دې حساسو موضوعاتو کې څرگندونې وکړي.
له دې وړاندې د پاکستان دفاع وزیر خواجه اصف په افغانستان کې د ټيټيپي د پټنځایونو په نښه کولو په اړه یو ځايي خبري ټلویزیون سره په مرکه کې ویلي و: « که ترهګر له افغان خاورې پر پاکستان برید کولای شي؛ نو ولې یې ځواب ونه وایو؟»
نوموړي په دې وروستیو کې له افغانستان سره د همکارۍ پر نشتوالي اندېښنه څرګنده کړې ده.
هغه وړاندیز وکړ، چې د افغانستان په اړه د پاکستان پالیسي باید له سره وارزول شي.
ښاغلی اصف وایي:« موږ د افغانستان لپاره ډېر څه کړي؛ خو دا هغه انعام دی چې موږ یې د خپلې مهربانۍ په بدل کې ترلاسه کوو.»
د طالبانو دفاع وزارت یو ځل بیا په ډاکه کړې، چې د طالبانو دریځ دا دی چې اجازه نه ورکوي د افغانستان خاوره د کوم بل هېواد په وړاندې وکارول شي.
