د اسلامي همکاریو سازمان د سرمنشي استازي د دوحې په ناسته کې د افغانستان د ستونزو د هواري لپاره له طالبانو سره د رغنده او دوامداره خبرو غوښتنه وکړه. طارق علي بخيت وویل، چې دغه سازمان له طالبانو سره د ښځو د تعلیم او کار او له ترهګرۍ سره د مبارزې په اړه رغنده خبرو ته دوام ورکوي.
د اسلامي همکاريو د سازمان له خوا په خپره شوې خبرپاڼه کې راغلي، چې ښاغلي بخيت په خپلو خبرو کې د افغانستان او خلکو له ګڼو ننګونو سره د مقابلې لپاره د یوې همغږې او منسجمې ستراتېژۍ پر اړتیا ټینګار وکړ.
هغه وویل؛ دغه هدف ته رسېدل د افغانستان له اوسنیو واکمنانو سره د دوامداره او رغنده تعامل له لارې ممکن دي.
د افغانستان لپاره د دوحې درېیمه غونډه د یکشنبې په ورځ پيل او نن دوشنبې پای ته ورسېده.
د دوحې په درېيمه ناسته کې د افغان مېرمنو لرې کول او پر هغوی د ظلم موضوع په افغانستان کې د ننه او بهر د دغه هېواد د اتباعو د پراخو اعتراضونو سره مخ شوې ده.
د افغانستان ګڼ شمېر مدني فعالانو، سیاسي څېرو او هېوادوالو له دې غونډې د بایکاټ غوښتنه کړې ده.
په ورته وخت کې د کاناډا د بهرنیو چارو وزارت په یوې اعلاميه کې د دوحې په عمومي غونډه کې د افغان ښځو د استازو، مذهبي اقلیتونو، قومي او د بشري حقونو د فعالانو نهشتون «خورا خواشینوونکی» بللی دی.
دغه وزارت وايي، د دوحې په ناسته کې د افغان مېرمنو له معقول او مساوي ګډون پرته به له دې ناستې څخه هېڅ هدف ترلاسه نه شي.
