د اوکراین په ختیځ کې د روسي ځواکونو له نفوذ سره سم د دغه هېواد د عدلیې وزیر په پوځ کې د څه باندې درې زره بندیانو د ګمارلو اعلان وکړ. اولنا ویسوتسکا اسوشیټیډ پریس ته وویل، محکوم کسان تیره میاشت د اوکراین پارلمان کې د یوه جنجالي قانون له تصویب وروسته خوشي او له پوځ سره یوځای شول.
د اوکرایني چارواکو په وینا، دغه بندیان د ازادېدو په بدل کې په پوځي قطعاتو کې ګمارل شوي دي.
اوکراین معمولاً په رسمي توګه د خپلو ځواکونو شمېر او د جګړې په ډګر کې د هغوی د تلفاتو احصایې نه اعلانوي، خو ځینو قومندانانو یې په وار وار اعتراف کړی، چې پوځ یې د ځواکونو له کمښت سره مخ دی.
تر دې مخکې اوکرایني چارواکو ویلي وو، چې د حکومت له خوا د بند د خلاصون په بدل کې د بندیانو د استخدام د پرېکړې له اعلان وروسته تر څلور نیم زرو څخه زیاتو بندیانو په پوځ کې د خدمت کولو غوښتنه کړې ده.
اوکرایني چارواکو ویلي دي چې دوی تمه لري له ۱۰ زرو څخه تر ۲۰ زرو پورې بندیان هم ورته غوښتنې وکړي.
په اوکراین کې، هغه کسان چې په جرمونو، په ځانګړې توګه په قتل محکوم شوي، له پوځي خدمت څخه منع دي.
د اوکراین د جګړې په پیل کې، د واګنر اجیر ډلې، په ورته اقدام کې، د ازادۍ د ژمنې په بدل کې د اوکراین په وړاندې د جګړې لپاره د روسیې د ځواکونو سره زرګونه بندیان یوځای شول. له هغه وخت راهیسې، د روسیې د دفاع وزارت د بندیانو د ګمارلو ته دوام ورکړی دی.
