د طالبانو د صنعت او سوداګرۍ وزارت وایي، چې د ازبکستان جمهوریت د کانونو او جیولوجۍ وزیر د کانونو په بېلابېلو برخو کې د دواړو هېوادونو ترمنځ پر نږدې همکاریو ټینګار کړی او د دواړو هېوادونو ترمنځ یې د پانګونې د ملاتړ هوکړه لیک د لاسلیک کولو غوښتنه کړې ده.
د دغه وزارت لهخوا په خپره شوې خبرپاڼه کې راغلي، چې د طالبانو د صنعت او سوداګرۍ وزارت سرپرست نورالدین عزیزي او مل پلاوي یې د ازبکستان جمهوریت د کانونو او جیولوجۍ له وزیر اسلاموف بوبیر فرخادویچ سره کتلي دي.خبرپاڼه کې راغلي، چې په ازبکستان کې د مسو د پروسس په برخه کې د دوو لویو فابریکو د جوړېدو په اړه هم خبرې شوې دي.خبرپاڼې د ښاغلي فرخادویچ له قوله ویلي:« دغه فابریکې اومو موادو ته سخته اړتیا لري، چې د افغانستان د مسو په اکتشاف او استخراج سره به دغه اړتیا پوره شي.»همدارنګه د صنعت او سوداګرۍ وزارت سرپرست ښاغلي عزیزي وړاندیز کړی، چې د افغانستان په شمال کې د تېلو او ګازو او دغه راز د غزني او هرات د مسو په کانونو او د کاني موادو د پروسس فابریکو د جوړولو په برخه کې پانګونه وکړي.
