په افغانستان کې د ملګرو ملتونو د بشري مرستو د همغږۍ اداره یا اوچا وايي، که په کافي اندازه او پر وخت سره بودیجه ترلاسه نه کړي، په افغاننستان کې به بشري ناورین رامنځته شي. اوچا نن په خپل اېکس کې لیکلي، چې دغه اداره د بودیجې له سخت کمښت سره مخ ده.
په افغانستان کې د ملګرو ملتونو د بشري مرستو د همغږۍ دا اداره زیاتوي، چې دوی په افغانستان کې د روغتیا، سرپناه، خوړو، تعلیم او ساتنې په برخو بودیجې ته جدي اړتیا لري.
د ملګرو ملتونو د بشري مرستو همغږي کوونکې ادارې تېره میاشت ویلي و، چې په افغانستان کې ۲۳،۷ مېلیونه وګړي بشري مرستو ته اړتیا لري، چې ۹،۲ مېلیونه یې ماشومان دي.
اوچا د خوراکي توکو ناامني، سیاسي حالات، طبیعي پېښې او د ساري ناروغیو خپرېدل په افغانستان کې د بې وزلۍ لاملونه ګڼي.
دغه سازمان وایي، چې له تېرو درېيو کلونو راهيسې چې طالبانو پر افغانستان واک تر لاسه کړى، د هېواد تر نيمايي زيات وګړي بشري مرستو ته اړتيا لري.
