د طالبانو د سرحدونو، قومونو او قبایلو چارو وزير وایي، چې د سرحدونو ساتل د دوی فریضه ده. نورالله نوري په لوګر ولایت کې د «اسلامي نظام ثبات، ولسونو د یووالي او انسجام» په نوم ولسي غونډه کې وویل، چې سرحدونه د افغانانو ارزښتونه دي او د هېواد اېنچ اېنچ خاوره د دوی تر نظر لاندې ده.
د طالبانو د سرحدونو، قومونو او قبایلو چارو وزارت د یوې خبرپاڼې په خپرولو سره د ښاغلي نوري له قوله لیکلي: «د افغانستان یوه لوېشت خاوره موږ ته تر سر ډېر ارزښت لري.»
نوموړی دغه څرګندونې په داسې حال کې کوي، چې پاکستان په ځلونو د افغانستان په ختیځو ولایتونو هوایي او ځمکني بریدونه کړي او طالبانو له غندلو پرته کوم اقدام نه دی کړی.
د دغه وزارت د خبرپاڼې له مخې، په لوګر ولایت کې د «اسلامي نظام ثبات، ولسونو د یووالي او انسجام» په نوم ولسي غونډه کې پر یو شمېر طالب چارواکو سربېره ددې ولایت سلګونه دیني عالمانو، قومي مشرانو اوعامه خلکو هم برخه اخیستې ده.
په دې غونډه کې د لوګر قومي مشرانو د پوهنې، برېښنا، د اوبو د بندونو د جوړولو، یو شمېر ولسوالیو ته د غځېدلي سړکونو د اساسي جوړولو، د روغتیا، کرنې او مالدارۍ، کانونو او یو شمېر نورو بنسټیزو پروژو د پلي کولو غوښتنه کړې ده.
