پاکستانۍ رسنۍ: د اسامه بن لادن نیول شوی ملګری امین الحق په خټه افغان دی

دغې رسنۍ د سرچينې د معلوماتو له مخې راپور ورکړی، چې امين الحق په خټه افغان دى.
د راپور له مخې، له هغه څخه په ترلاسه شوي پاکستاني شناختي کارت کې د ٢٠١٠ کال نېټه ليکل شوې ده چې په دې اړه جلا څېړنې روانې دي.
سرچينې زياته کړې، امين الحق پلټونکو چارواکو ته ادعا کړې چې د القاعده له پخواني مشر اسامه بن لادن سره يې وروستۍ ناسته د ٢٠٠١ زېږديز کال (د نومبر په ١٥مه) شوې وه.
د پنجاب د ترهګرۍ ضد څانګې تېره ورځ اعلان وکړ، چې د القاعدې د پخواني مشر اسامه بن لادن یو نږدې ملګری یې له ګجرات څخه نیولی دی.
د سي ټي ډي یوه چارواکي عثمان اکرم ګوندل په يوه خبري کانفرنس کې ویلي، چې دغه کس د استخباراتي معلوماتو پر بنسټ د عملياتو وروسته نيول شوی و.
ویل کېږي، نيول شوی کس امين الحق د القاعدې مهم غړی و، چې نوم یې د ملګرو ملتونو د نړۍوالو ترهګرو په نوملړ کې هم شامل دی.
سي ټي ډي وايي، چې دغه ترهګر د ۲۰۲۱کال په اګسټ میاشت کې افغانستان ته تللی و او په دې وروستيو کې بېرته پاکستان ته راغلی.
د یادولو وړ ده چې د القاعدې پخوانی مشر اسامه بن لادن د ۲۰۱۱ کال د مې په دویمه نیټه په اېبټ اباد کې د امریکا په عملیاتو کې وژل شوی و.