د هرات او بامیان ولایتونو غره ختونکو د ایراني غره ختونکي رسول جعفر دهباشي سره یو ځای د یکشنبې په ورځ (د چنګاښ ۳۱مه) نېټه د بامیان په ولایت کې د «شاه فولادي» ۵۱۴۰ متره لوړې څوکې ته پورته شول.
شاه فولادي د بامیانو یوه له لوړو څوکو څخه ده، چې سختې لارې لري او د لوبغاړو لپاره دې څوکې ته ختل سخت دي.
د هرات او باميانو د لوبغاړو تر څنګ د يوه ايراني غره ختونکي په ګډون د شاه فولادي څوکې ته پورته کېدل د غلام علي رضايي تر څار لاندې تر سره شول.
دا په روان کال کې دې څوکې ته د غره ختونکو دویم ځل دی.
د باميانو د ورزش ادارې ليکلي، چې د بشپړو وسايلو د نشتوالي له امله درې تنه غره ختونکي نه شي کولى، چې له پنځه زره مترو څخه پورته ولاړ شي.
طالب ورزشي مسولين وايي، چې د شاه فولادي څوکې ته د لوبغاړو د تګ څخه يې موخه د افغانستان طبيعي جاذبه ښودل او په کور دننه او بهر د لوبغاړو ترمنځ د اړيکو پراخوالی ښودل شوی.
