طالبانو په هرات کې په 'پخواني سره رنګ کې' د درې ټایریزه رېکشاو په ګرځېدو بندیز لګولی
په هرات کې د طالبانو د ټرافیکو مشر ویلي، «په پخواني سره رنګ کې» به هغه درې ټایریزه رېکشاوې راټولې کړي چې دا مهال د ښار په واټونو تګ راتګ کوي.
په هرات کې د طالبانو د ټرافیکو مشر ویلي، «په پخواني سره رنګ کې» به هغه درې ټایریزه رېکشاوې راټولې کړي چې دا مهال د ښار په واټونو تګ راتګ کوي.
د طالبانو تر واک لاندې باختر خبري اژانس د ذبیح الله اکبري له قوله لیکلي، چې دغه رېکشاوې «خوندي نه دي او د ښار د ککړتیا لامل» کېږي.
خو نوموړي دا نه دي ویلي، چې ولې یوازې په «سره رنگ» کې پخوانۍ رېکشاوې ټولیږي او که دغه پخوانۍ رېکشاوې په بل رنګ کې وي هغه به هم ټولې شي که څنګه.
دغه طالب چارواکي ویلي، چې دغه رېکشاوې د ښار د ننه د تګ راتګ اجازه نه لري؛ خو له ښاره د باندې کولای شي چې له یوې سیمې نه بلې ته تګ راتګ وکړي.
اکبري دا رنګه ویلي، چې په تېرو دوو اونیو کې ۷۰۰ موټر سایکلونه او ۳۰۰ رېکشاوې د ګرځېدو جواز د نشتوالی او د ټرافیکي قوانینو څخه د سرغړونو له امله درول شوې دي.
خو هغه دا نه دي ویلي، چې د دغو رېکشاو په راټولو سره به د رېکشاو خاوندانو ته خساره ورکړي او که نه.
د پاکستان د بهرنیو چارو وزیر ویلي، چې په اروپا کې مېشتو افغانانو په فرانکفورت، لندن او بروکسل کې د پاکستان د ډیپلوماټیکو ماموریتونو پر ضد "تاوتریخوالی او لاریونونه" کړي دي.
د کډوالو په چارو کې ملګرو ملتونو عالي کمیشنرۍ سره په اړیکه کې هغه ویلي، چې په پاکستان کې د افغان کډوالو ستونزې د دایمي حل لپاره کار کوي.
د پاکستان د بهرنیو چارو وزارت وايي، چې د پاکستان مرستیال لومړي وزیر او د بهرنیو چارو وزیر اسحاق ډار د پنجشنبې په ورځ د کډوالو لپاره د ملګرو ملتونو عالي کمېشنر فیلیپو ګرانډي سره ټیلیفوني خبرې کړي دي.
د پاکستان د بهرنیو چارو وزارت ویلي، چې دواړو لورو د پاکستان او د کډوالو په چارو د ملګرو ملتونو د عالي کمیشنرۍ ترمنځ د همکارۍ پر اړه خبرې کړي دي.
ډار وویل، چې نوموړي د ګرانډي سره "په فرانکفورت، لندن او بروکسل کې (په بهر کې د میشتو افغانانو له خوا) د پاکستان د ډیپلوماتیکو ماموریتونو په وړاندې د وروستیو بریدونو او تاوتریخوالي هم خبرې کړي دي.
د چنګاښ په ۳۰ مه د قهرجنو لاریونکوونکو یوې ډله په فرانکفورت کې د پاکستان قونسلګرۍ ته ننوتل او د پاکستان بیرغ یې ښکته کړ. د راپورونو له مخې دا پېښه د پښتون ژغورنې غورځنګ په ملاتړ او د دغه غورځنګ د یو غړي ګیلهمن وزیر د وژنې په اعتراض کې د یو لاریون پر مهال شوې ده.
په دغه برید کې پاکستاني وګړو هم برخه لروده. د پاکستان د اطلاعاتو وزیر د چنګاښ په ۳۱ مه ویلي، چې د جرمني په فرانکفورت کې د پاکستان پر کونسلګرۍ په برید کې د ښکېلو پاکستاني وګړو شناختي کارډونه او پاسپورټونه به بند شي.
له برید وروسته، پاکستان د جرمني سفیر احضار کړ. د پاکستان د بهرنیو چارو وزارت یو ویاند نن وویل، چې برلین د برید عاملینو ته د سزا ورکولو ژمنه کړې ده.
تر دې وړاندې د ګیلهمن وزیر له وژل کېدو وروسته د پښتون ژغورنې غورځنګ یو شمېر پلویانو په لندن کې د پاکستان پر سفارت هم برید کړی و.
د پاکستان د بهرنیو چارو وزارت وايي، چې د کډوالو عالي کمېشنرۍ د پاکستان د حکومت د وروستۍ پرېکړې ستاینه کړې چې د کډوالو د ثبت کارتونو د اعتبار موده یې غځولې ده.
دواړو لورو موافقه کړې چې د پاکستان او د کډوالو عالي کمېشنرۍ ترمنځ د همکارۍ د پراختیا او د افغان کډوالو موضوع ته د دایمې حل لارې موندلو لپاره ګډ کار ته دوام ورکړي.
د ملګرو ملتونو د کډوالو عالي کمېشنر د روانې میاشتې په پیل کې د افغان کډوالو د وضعیت د ارزونې په موخه پاکستان ته سفر کړی و. نوموړي له پاکستاني چارواکو سره تر خبرو وروسته د افغان کډوالو د استوګنې د کارتونو د غځولو په اړه د شوې موافقې خبر ورکړی و.
ایراني رسنیو خبر ورکړی، چې د ایران اسلامي جمهوریت په بندر عباس زندان کې یو ځوان افغان د نشه یي توکو د قاچاق په تور اعدام شوی دی.
د راپورونو له مخې؛ ګلاب شاه نورزی د سې شنبې په سهار د هغه د کورنۍ له خبرولو پرته په پټه اعدام شوی دی.
۴۳ کلن ګلاب شاه د فراه ولایت اوسېدونکی و.
نوموړی له نیول کېدو او په بندر عباس کې د ایران د اسلامي انقلابي محکمې له خوا د اعدام د حکم له صادرېدو وروسته پنځه کاله په بند کې تېر کړي و.
یوازې څلور ورځې وړاندې د یکشنبې په ورځ د حلبوش د بشري حقونو سازمان د کرج په قزل حصار زندان کې د نشه يي توکو د جرمونو په تور د یو افغان د اعدام خبر ورکړ.
د افغانانو د محاکمې او زندان د وضعیت په اړه څه نه دي ویل شوي. دا څرګنده نه ده چې ایا دوی عادلانه محاکمې او مدافع وکیل ته لاسرسی درلود که نه.
د ځینو رسنیو د راپورونو له مخې؛ په ۲۰۲۳ کال کې په ایران کې د اعدامونو مجموعي شمېر ۸۵۳ ته رسېږي، چې له ۲۰۱۵ کال راهیسې تر ټولو لوړه شمیره ښيي. ویل کیږي چې دا شمېره د "ښځې، ژوند، ازادۍ" له مظاهرو وروسته د ۲۰۲۲ کال په پرتله ۴۸ سلنه زیاته شوې ده.
ترکي سرچینو افغانستان انټرنشنل ته ویلي، چې د افغانستان په شمال کې د طالبانو ضد پوځي قوماندان او د پارلمان پخوانی غړی ګل محمد پهلوان له ترکیې څخه ایستل شوی دی. د سرچینو په وینا؛ په ترکیه کې د ښاغلي پهلوان د اوسېدو اسناد لغوه شوي او هغه ایران ته تللی دی.
د سرچینو په خبره؛ دغه ازبک قوماندان چې کلونه یې د طالبانو پر ضد جګړه کړې، له ترکیې څخه تر شړلو وروسته اوس په ایران کې دی.
د سرچینو په وینا؛ قوماندان ګل محمد پهلوان د ترکیې تابعیت تر لاسه کولو لپاره په انقره او استانبول کې ملکیتونه اخیستي وو.
خو د ترکيې حکومت په دغه هېواد کې د جايداد له اخيستلو سره - سره د هغه د اوسېدو اجازه لغوه کړې ده.
ګل محمد پهلوان چې د فاریاب ولایت په شیرین تګاب ولسوالۍ کې پوځي قوماندان و، د ولسي جرګې د ۱۶ دورې په ټاکنو کې د مارشال دوستم په ملاتړ له بلخ ولایت څخه ولسي جرګې ته بریالی شوی و.
سرچينه وايي، ګل محمد پهلوان په تېر حکومت کې د سيمه ييز قوماندان په توګه کلونه - کلونه د طالبانو پر ضد جګړه کړې وه.
تر دې مخکې د سپټمبر په ۲۲مه د جنبش ګوند ځینو سرچینو تایید کړې وه، چې د ترکیې حکومت د عبدالرشید دوستم اړوند پنځه پوځي قوماندانان نیولي او په استانبول کې یې د کډوالو د ساتنې یوه مرکز ته سپارلي دي.
سرچینې افغانستان انټرنشنل ته دا هم ویلي، چې ترکي پولیسو د افغانستان د جنبش ملي ګوند څلور پوځي قوماندانان اړ کړي، چې له ترکیې څخه د اخراج لیکونه لاسلیک کړي.
د دغه ګوند ویاند احسان نیرو د یکشنبې په ورځ تایید کړه، چې د دې ګوند یو قوماندان عزت الله چې په زیل قوماندان مشهور و، د سرپل په ولایت کې د ناپېژانده وسله والو له خوا له ایرانه تر شړلو وروسته وژل شوی دی.
د روزګان ولایت د خاص روزګان ځايي سرچينو افغانستان انټرنشنل ته تاييد کړه، چې طالبانو د يوه هزاره ديني عالم د وژلو په تور شاوخوا ٤٣ تنه هزاره ګان د شش پر له سيمې نيولي دي.
ځايي خلک وايي، ملا د روزګان په خاص روزګان کې د "ځنځیري قتلونو" په لړ کې وژل شوی دی.
د چنګاښ په ۳۰مه، سیمه ییزو سرچینو افغانستان انټرنشنل ته وویل، چې ناپېژاندو وسله والو د خاص روزګان ولسوالۍ د یوه جومات ملا امام رستم رحیمي په چړو وواژه او په جومات کې دننه ووژل شو.
اوس سرچينې وايي، چې په دې وروستيو ورځو کې طالبانو د شش پر سيمې اوسېدونکي رابللي او يو شمېر يې د پوښتنو ګروېږنو لپاره وړي دي.
د سرچينې د معلوماتو له مخې؛ يو شمېر بنديان تر پوښتنو ګروېږنو وروسته خوشې شوي، خو د سې شنبې او چهارشنبې په ورځو نيول شوي.
شاوخوا ٤٣ کسان دا مهال په توقيف کې دي.
د سرچینې په وینا؛ طالبانو د پنجشنبې په ورځ هم د سیمې یو شمېر اوسېدونکي د پوښتنو ګروېږنو لپاره نیولي دي.
څو سرچینو افغانستان انټرنشنل ته تایید کړې، چې د ښاغلي رحیمي مېرمن له بریده وروسته د لومړي ځل لپاره جومات ته تللې وه.
د سرچينې په وينا؛ د ښاغلي رحيمي مېرمن وايي، بريدګر "پښتانه" وو، خو طالبان د هغې شهادت نه مني او وايي، له دې امله چې ښځه ده، د هغې د شهادت د تاييد لپاره بايد بله ښځه ګواهي ورکړي.
سرچينې زياته کړې، چې طالب چارواکي هڅه کوي چې د شيعه عالم د وژنې پړه پر هزاره ګانو واچوي.
تېر کال یوناما تایید کړه، چې د روزګان په خاص روزګان ولسوالۍ کې د هزاره ګانو پر وړاندې تاوتریخوالی او وژنې روانې دي.
تر دې مخکې د شش پر سيمې اوسېدونکو ويلي وو، چې د رستم رحيمي وژنه په تېرو درېيو کلونو کې د سيمې د اوسېدونکو ٢١مه وژنه ده.
د سیمې اوسېدونکي طالبان د هزاره ګانو په وژنه کې په لاس لرلو تورنوي.
تېر کال په روزګان ولایت کې سیمه ییزو سرچینو افغانستان انټرنشنل ته ویلي وو، چې په تېرو دوو کلونو کې د روزګان خاص ولسوالۍ ۱۴ اوسېدونکي په "منظم او هدفي" ډول وژل شوي دي.
د پاکستان د بهرنیو چارو وزارت ویانده وايي، د القاعده غړی امین الحق په تېر مارچ کې له افغانستانه پاکستان ته د اوښتو پر مهال ونیول شو. خو تر دې مخکې د پاکستان د پنجاب صوبې پولیسو ویلي و، د دغه هېواد د ترهګرۍ ضد ادارې امین الحق د دې صوبې د جیلم سیمې په سرای عالمګیر کې نیولی دی.
پاکستاني چارواکو د جولای پر ۱۹ یا شپږ ورځې مخکې د نوموړي د نیول کېدو خبر رسنیز کړ.
هغه مهال د پاکستان د ترهګرۍ ضد ادارې وویل، چې د استخباراتي ځواکونو په همکارۍ یې امین الحق ونیو.
هغه مهال پاکستاني چارواکو د نوموړي د نیول کېدو کره نېټه ونه ښوده، خو د پاکستان د بهرنیو چارو وزارت ویاندې نن په اسلام اباد کې خبریالانو ته وویل: «د القاعده غړی امین الحق په سږني مارچ کې زموږ قانون پلي کوونکو ادارو هغه وخت ونیو چې له افغانستانه بې قانونه پاکستان ته اوښت.»
هغې زیاته کړه، چې د نوموړي اړوند مالومات یې له ملګرو ملتونو سره هم شریک کړي دي.
تر دې مخکې پاکستاني چارواکو دا هم ویل، چې امین الحق پاکستانی شناختي کارډ سره پاکستان کې وخت تېراوه.
د افغانستان د ننګرهار اوسېدونکی امین الحق د القاعده د پخواني مشر اسامه بن لادن نږدې ملګری پاتې شوی.
اسامه بن لادن د ۲۰۱۱ کال د مۍ په دویمه کې د پلازمېنې اسلام اباد په څو پنځوس کیلومترۍ کې د پاکستان د یوې پوځې اډې ته څېرمه د امریکا د ځانګړو ځواکونو برید کې ووژل شو.
د پاکستان د ترهګرۍ ضد اداره وايي، چې امین الحق د ۲۰۰۱ کال د نومبر پر ۱۵ په وروستي ځل له اسامه سره لیدلی دي.
امین الحق د اسامه تر مرګ مخکې او ۲۰۰۷ کال کې په پاکستان کې ونیول شو، چې امریکايي چارواکو هم ترې پلټنې وکړې.
امنن الحق پر ۲۰۱۱ کال د پاکستان له بند خوشی شو.
نوموړی د ملګرو ملتونو د بندیزونو په نوملړ کې شامل دی
امین الحق د ۲۰۲۱ کال د اګست پر ۱۵ د طالبانو واکمنېدو سره افغانستان ته لاړ او هلته یې طالب وسلوالو تود هرکلی وکړ.
