په نیویارک کې پولیسو د یوه مسلمان د کور له دروازې د طالبانو بیرغ راښکته کړ
په نیویارک کې پولیسو د یوې مسلمانې کورنۍ له بهرنۍ دروازې د طالبانو بیرغ راښکته کړ. نیویارک پوسټ راپور ورکړی چې پولیسو د طالبانو بیرغ پورته کولو له امله دغه کورنۍ ورغوښتې ده.
په نیویارک کې پولیسو د یوې مسلمانې کورنۍ له بهرنۍ دروازې د طالبانو بیرغ راښکته کړ. نیویارک پوسټ راپور ورکړی چې پولیسو د طالبانو بیرغ پورته کولو له امله دغه کورنۍ ورغوښتې ده.
ویل کیږي چې د کور خاوند نه پوهېده چې دا بیرغ د طالبانو دی.
د امریکا د بروکلین د ښاري شورا غړې اینا ورنیکوف د یوې ویډیو په خپرولو سره د دغه مسلمان کور بهر د طالبانو د بیرغ په لګولو سخته نیوکه وکړه.
هغې وويل: «موږ په خپل منځ کې د ترهګرۍ ملاتړي لرو.»
په دې ویډیو کې لیدل کېږي چې د طالبانو د بیرغ ترڅنګ د فلسطین بیرغ هم ځوړند شوی دی.
د ښاري شورا دغه غړې د فلسطین د بیرغ یادونه نه ده کړي.
د دې ويډيو له خپرېدو وروسته سيمه ييزو پوليسو ياده کورنۍ ورغوښتې او د هغوی د کور له دروازې يې د طالبانو بيرغ لرې کړی.
نیویارک پوسټ د کورنۍ د هویت له ښودلو پرته خبر ورکړی، چې د کور خاوند نه پوهیده، چې بیرغ د طالبانو دی.
د کور خاوند ادعا وکړه چې له کومې ډلې سره همکاري نه لري، خو د بروکلین د ښاري شورا د غړي له خوا د ویډیو له خپرېدو وروسته له جدي ګواښونو او ان په مرګ ګواښلو سره مخامخ شوې ده.
ورنیکوف وویل چې د طالبانو د بیرغ پورته کول «د هر هغه امریکایي سرتیري په مخ یو کلکه څپیړه ده چې تر دې بیرغ لاندې وژل شوي.»
هغه د طالبانو د بيرغ د لرې کولو په اړه د دغې مسلمانې کورنۍ د پرېکړې هرکلى وکړ او ويې ويل: «خلک بايد د ترهګرۍ ملاتړ ونه کړي.»
وروستیو ورځو کې په ایران کې د افغان کډوالو پر وړاندې اعتراضونه او ناوړه چلند زیات شوی دی.
هغه ویډیو چې افغانستان انټرنشنل ته رسیدلې، یو شمېر لاریون وال ښيي چې پر سړک لاریون کوي او ویل کیږي دا هغه سړک دی چې یو ایرانی پکې وژل شوی دی. ډېری لاریون وال ښځې دي چې تر څنګ یې پولیس هم لیدل کیږي.
لاریون کوونکو د «مرګ پر افغان» او «افغان جنایت کوي، دولت یې ملاتړ» شعارونه ورکول. دا ویډیو لنډه ده او د لاریون کوونکو له خوا مطرح شوې غوښتنې روښانه نه دي.
په دې وروستیو کې، د تهران په ۱۵مه سیمه کې د یو ایراني د وژل کیدو د خبر له خپریدو وروسته، په تهران کې یو شمېر افغان کډوالو افغانستان انټرنشنل ته وویل، چې د تهران په ختیځ کې د سیمې اوسیدونکي له دوی سره ډېر ناوړه چلند کوي.
تېره اوونۍ راپور ورکړل شو، چې یو ایرانی له دریو افغان کډوالو سره په شخړه کې وژل شوی دی.
افغانستان انټرنشنل ته یو بل کډوال د تهران د ۱۵مې سیمې څخه د یوې خبرتیا انځور استولی، چې پکې افغان کډوالو ته خبرداری ورکړل شوی چې سمدستي دې دا سیمه تخلیه کړي.
په دغې خبرتیا کې چې کس یا بنسټ یې څرګند نه دی، افغان کډوالو ته خبرداری ورکړل شوی « که له ۱۵مې سیمې ونه وځئ له ایران څخه به په زوره واېستل شئ.»
تسنیم خبري اژانس تېره اوونۍ لیکلي وو، چې د روغتون په بیړنۍ خونه کې د یو ایراني له وژل کېدو وروسته د پلازمېنې پولیسو درې افغان وروڼه د دغه ایرانې د وژل کیدو په تور نیولي دي.
دغه خبری ژانس د یوې مېرمنې له قوله چې درې تنه کډوال کارګران یې اپارتمان ته تللي وو، لیکلي: «زما میړه تهران ته د کار لپاره تللی و او زه په کور کې یوازې وم. دا درې وروڼه چې زموږ ګاونډیان دي، د ودانۍ د لګښت د اخېستو لپاره راغلي وو او په سر کې د ساختماني مسایلو له امله زموږ ترمنځ لفظي شخړه رامنځ ته شوه.»
دغې مېرمنې چې دغه درې افغان کډوال کارګر په فحشا تورن کړي وايي، د دغو کارګرانو له تګ وروسته یې خپل میړه سره اړیکه ونیوله او ساعت وروسته یې لیور ( د میړه ورور) دغو دریو کارګرانو پسې ورغی او ترمنځ یې شخړه وشوه.
په وروستیو میاشتو کې په ټولنیزو شبکو او رسنیو کې د ایران په بېلابېلو ښارونو کې د افغان کډوالو د شتون په اړه نیوکې ډېرې شوې دي.
له دغو نیوکو سره سم، ایراني پولیسو د افغان کډوالو د نیولو او اېستلو لړۍ ګړندۍ کړې ده.
