په افغانستان کې د روغتیا نړۍوال سازمان د دغه هېواد له خلکو وغوښتل، چې د زېړي ناروغۍ معایناتو، درملنې او واکسین کولو ته پام وکړي. د روغتیا د نړۍوال سازمان د شمېرو له مخې، په تېره یوه لسیزه کې په افغانستان کې تر یو لکو ډېر کسان په دې ناروغۍ اخته شوي دي.
د زېړي ناروغۍ د نړۍوالې ورځې په مناسبت د روغتیا نړۍوال سازمان اعلان وکړ، چې غواړي سږ کال په افغانستان کې د دغې ناروغۍ پر له منځه وړلو تمرکز وکړي.
د روغتیا نړۍوال سازمان په خپله رسمي پاڼه کې د یوې ویډیو په خپرولو سره د افغانستان له خلکو غوښتي، چې له دغه سازمان سره په ګډ کار کې د زېړي ناروغۍ د له منځه وړلو بهیر په واقعیت بدل کړي.
یاد سازمان وویل: «اوس د عمل کولو وخت دی او په ګډه موږ کولی شو دې ناروغۍ ته ماتې ورکړو.»
د روغتیا د نړۍوال سازمان د شمېرو له مخې، په ټوله نړۍ کې ۳۰۴ مېلیونه کسان په زیړي ناروغۍ اخته دي.
دا ناروغي په هرو ۳۰ ثانیو کې یو کس وژني.
د روغتیا نړۍوال سازمان وايي، په تېره یوه لسیزه کې په افغانستان کې تر سل زره ډېر کسان په دې ناروغۍ اخته شوي، چې له دې ډلې ۷۰ زره د هپاتیت (بي) په ناروغۍ او نور ۳۰ زره ناروغان د هپاتیت (سي) په ناروغۍ اخته دي.
زېړی د ځيګر التهابي ناروغي ده، چې د بېلابېلو عواملو له امله رامنځته کیږي.
د ډاکترانو په وینا، د ځینو درملو اخیستل، په باکتریا یا ویروس اخته کېدل او یا د ډېر الکولو څښل د دې ناروغۍ لاملونه دي.
په ورته وخت کې هپاتیت یوه د درملنې وړ ناروغي ده او د واکسین په واسطه يې مخه نیول کېدای شي.
