د طالبانو د ریاست الوزرا سیاسي مرستیال مولوي عبدالکبیر د ایران د کورنیو چارو وزیر احمد وحیدي سره په لیدنه کې د افغانستان او ایران ترمنځ د دوه اړخیزو اړیکو د پیاوړتیا، ایران کې د مېشتو افغان کډوالو د ستونزو د حل او پر پوله د نشه يي توکو د قاچاق د مخنیوي په اړه غږېدلی دی.
د طالبانو د ارګ اېکس پاڼې لیکلي، چې مولوي عبدالکبیر ایران ته په رسمي سفر تللی او دغه لیدنه د سې شنبې په ورځ (د زمري ۹مه) ترسره شوې ده.
د طالبانو ارګ اېکس پاڼه زیاتوي، چې ښاغلي وحیدي وویل، تهران له طالبانو سره په بېلابېلو برخو کې د اړیکو لاپراختیا ته لېوال دی.
ښاغلي وحیدي زیاته کړه، په افغانستان کې د امنیت له ټېنګښت سره پر پوله ډېرې ستونزې حل شوي دي، ایراني چارواکو د یو شمېر پخوانیو ننګونو د له منځه تلو له امله ډاډ ترلاسه کړی او ترڅنګ یې په بېلابېلو برخو کې همکاریو ته زمینه برابره شوې ده.
په دې کتنه کې ښاغلي عبدالکبیر له ګاونډیو هېوادونو سره مثبتې او رغنده اړیکې د طالبانو د بهرني سیاست مهمه برخه وبلله او زیاته یې کړه: «په افغانستان کې د نشه يي توکو کښت او کاروبار صفر ته راښکته شوی دغه چاره نه یوازې د افغانانو، بلکې د ټولې سیمې او نړۍ په ګټه ده.»
مولوي عبدالکبیر وویل، چې په افغانستان کې د مسوول او حاکم نظام په توګه هیچا ته دا اجازه نه ورکوي، چې خاوره یې د ګاونډیانو یا نړۍ پر ضد وکارول شي.
ایران ته د طالبانو د ریاست الوزرا سیاسي مرستیال سفر په داسې حال کې ترسره شوی، چې د ایران په بېلابېلو سیمو کې افغان کډوال د ایران د ځایي خلکو له تند او ناوړه چلند څخه شکایت کوي.
په دې وروستیو ورځو کې د تهران په ختیځ کې یو شمېر افغان کډوالو افغانستان انټرنشنل ته وویل، چې د سیمې خلک د دې سیمې په پارکونو، کوڅو او تمځایونو کې پر افغان کډوالو بریدونه کوي.
په وروستیو میاشتو کې د ایران پولیسو هم د افغان کډوالو د اېستلو بهیر ګړندی کړی دی.
د راپورونو له مخې؛ پولیس ان د قانوني اسنادو سره افغانان نیسي او په زوره یې له دغه هېواده باسي.
